Bishkekte №2 avtobýsta jolaýshylar arasynda bolǵan janjalǵa qatysty tergeý jalǵasyp jatyr. Oqiǵaǵa qatysýshylardyń biri – 34 jastaǵy Parizat bolǵan jaǵdaidy baiandap, óz nusqasyn aitty, dep habarlaidy ult.kz.
Parizattyń sózinshe, janjal bolǵan kúni ol eki táýlik jumys istep, úiine qaityp kele jatqan. Keiin anasymen birge aýrýhanaǵa barý úshin telefon arqyly dárigerdiń qabyldaýyna jazylyp otyrǵan.
Onyń aitýynsha, sol sátte qasyna kelgen áieldiń oryn berýin suraǵanyn baiqamai qalǵan. Parizattyń pikirinshe, jolaýshy onyń ótinishti ádeii elemei otyrǵanyn túsingen bolýy múmkin.
«Ol meniń moinymnan iterip, bala tárbieme qatysty aýyr sózder aita bastady. Men oǵan jaýap bermei, aýrýhanamen sóilesýdi jalǵastyra berdim», – dedi Parizat.
Telefondaǵy qońyraýyn aiaqtaǵannan keiin ol jaǵdaidy túsindirý úshin áieldiń qasyna barǵan. Parizattyń aitýynsha, ol telefonymen álgi áieldi nusqap, nazaryn aýdarǵysy kelgen. Alaida bul qimylyn ainaladaǵylar basqasha túsinýi múmkin ekenin atap ótti.
«Men jaǵdaidyń qalai bolǵanyn túsindirgim keldi. Biraq ol maǵan shabýyl jasap, uryp, shashymnan tarta bastady. Men de ashýǵa berilip, telefondy laqtyryp jiberdim», – dedi ol.
Parizat óz áreketin de durys dep eseptemeitinin aitty.
«Iá, meniń de oǵash áreket jasaǵanym ras. Men de emotsiiaǵa berilip kettim», – dedi ol.
Qazir avtobýsta bolǵan janjal boiynsha tiisti tekserý men tergeý jumystary jalǵasyp jatyr. Oqiǵanyń barlyq mán-jaiy anyqtalǵannan keiin oǵan quqyqtyq baǵa beriledi.
