Aqtóbe oblysynda avtobýstaǵy órtte qaza tapqan 52 adamnyń barlyǵynyń máiiti Aqtóbege jetkizildi, dep habarlady Azattyq tilshisi. Aqtóbe oblystyq densaýlyq saqtaý basqarmasynyń bastyǵy Áset Qalievtiń Azattyqqa aitýynsha, marqumdardyń máiiti túgel ótken túni jetkizilgen.
Qaty kúiip qalǵandyqtan kimniń-kim ekenin ajyratyp taný múmkin emes. Genetikalyq saraptama arqyly ǵana ajyrata alatyn bolǵandyqtan, sot-meditsinalyq saraptama ortalyǵynda tań atqansha genetikalyq saraptama jasaldy. Endi qujattar rásimdelip jatyr, - dedi Qaliev.
18 qańtar kúni túngi 11.30-da Aqtóbe oblysynyń ákimdigi avtobýstaǵy órtke qatysty ótkizgen brifingte oblys ákiminiń orynbasary Serik Tólenbergenov qaza tapqan 44 adamnyń máiiti tabylǵanyn habarlaǵan bolatyn.
Ákimniń ókili órttiń shyǵý sebebi áli tolyq anyqtalmaǵanyn, aýa raiynyń qolaisyzdyǵy apattyń sebepterin anyqtaýǵa kedergi keltirip jatqanyn aitqan.
«Bul oqiǵa qandaida bir qylmys emes, qaiǵyly jaǵdai. Aman qalǵan bes adamnyń aitýynsha, avtobýs ishine gaz jaiylyp kóbi ýlanyp qalǵan. Avtobýs eki qabatty bolǵan. Jolaýshylar ekinshi qabatta otyrǵan. Al birinshi qabatta júkter qoiylǵan. Kóbi syrtqa shyǵyp úlgermegen» degen Tólepbergenov.
18 qańtar kúni saǵat 10:30-da Aqtóbe oblysynyń Yrǵyz aýdany Qalybai aýylynan 10 kilometr qashyqtyqta Shymkent – Samara jolynda jolaýshylar avtobýsy órtenip, 52 adam qaza tapqan. Avtobýsta barlyǵy 57 adam – 55 jolaýshy men eki júrgizýshi bolǵany habarlanǵan. Úsh jolaýshy men eki júrgizýshi aman qalǵan. Qaiǵyly oqiǵa oblys ortalyǵy Aqtóbeden 320 kilometr qashyqtyqta bolǵan.
