اقتٶبە وبلىسىندا اۆتوبۋستاعى ٶرتتە قازا تاپقان 52 ادامنىڭ بارلىعىنىڭ مەيٸتٸ اقتٶبەگە جەتكٸزٸلدٸ, دەپ حابارلادى ازاتتىق تٸلشٸسٸ. اقتٶبە وبلىستىق دەنساۋلىق ساقتاۋ باسقارماسىنىڭ باستىعى ەسەت قاليەۆتٸڭ ازاتتىققا ايتۋىنشا, مارقۇمداردىڭ مەيٸتٸ تٷگەل ٶتكەن تٷنٸ جەتكٸزٸلگەن.
قاتى كٷيٸپ قالعاندىقتان كٸمنٸڭ-كٸم ەكەنٸن اجىراتىپ تانۋ مٷمكٸن ەمەس. گەنەتيكالىق ساراپتاما ارقىلى عانا اجىراتا الاتىن بولعاندىقتان, سوت-مەديتسينالىق ساراپتاما ورتالىعىندا تاڭ اتقانشا گەنەتيكالىق ساراپتاما جاسالدى. ەندٸ قۇجاتتار رەسٸمدەلٸپ جاتىر, - دەدٸ قاليەۆ.
18 قاڭتار كٷنٸ تٷنگٸ 11.30-دا اقتٶبە وبلىسىنىڭ ەكٸمدٸگٸ اۆتوبۋستاعى ٶرتكە قاتىستى ٶتكٸزگەن بريفينگتە وبلىس ەكٸمٸنٸڭ ورىنباسارى سەرٸك تٶلەنبەرگەنوۆ قازا تاپقان 44 ادامنىڭ مەيٸتٸ تابىلعانىن حابارلاعان بولاتىن.
ەكٸمنٸڭ ٶكٸلٸ ٶرتتٸڭ شىعۋ سەبەبٸ ەلٸ تولىق انىقتالماعانىن, اۋا رايىنىڭ قولايسىزدىعى اپاتتىڭ سەبەپتەرٸن انىقتاۋعا كەدەرگٸ كەلتٸرٸپ جاتقانىن ايتقان.
«بۇل وقيعا قاندايدا بٸر قىلمىس ەمەس, قايعىلى جاعداي. امان قالعان بەس ادامنىڭ ايتۋىنشا, اۆتوبۋس ٸشٸنە گاز جايىلىپ كٶبٸ ۋلانىپ قالعان. اۆتوبۋس ەكٸ قاباتتى بولعان. جولاۋشىلار ەكٸنشٸ قاباتتا وتىرعان. ال بٸرٸنشٸ قاباتتا جٷكتەر قويىلعان. كٶبٸ سىرتقا شىعىپ ٷلگەرمەگەن» دەگەن تٶلەپبەرگەنوۆ.
18 قاڭتار كٷنٸ ساعات 10:30-دا اقتٶبە وبلىسىنىڭ ىرعىز اۋدانى قالىباي اۋىلىنان 10 كيلومەتر قاشىقتىقتا شىمكەنت – سامارا جولىندا جولاۋشىلار اۆتوبۋسى ٶرتەنٸپ, 52 ادام قازا تاپقان. اۆتوبۋستا بارلىعى 57 ادام – 55 جولاۋشى مەن ەكٸ جٷرگٸزۋشٸ بولعانى حابارلانعان. ٷش جولاۋشى مەن ەكٸ جٷرگٸزۋشٸ امان قالعان. قايعىلى وقيعا وبلىس ورتالىعى اقتٶبەدەن 320 كيلومەتر قاشىقتىقتا بولعان.
