Elbasy Nursultan Nazarbaev aýylǵa degen qamqorlyqty memleket árdaiym nazarda ustaýy kerektigin eske saldy, dep habarlaidy QazAqparat.
«Stýdent kezde jazdai aýylǵa baryp, bidai oratynbyz. Qyrkúiek pen qazanda barlyǵyn oqýdan alyp qalyp, aýylǵa jiberetin. Aýyldyq jerge barlyq júk kóligin, tehnikany, elektrikti, áskerdi - barlyǵyn jiberetin. Qazir eshbir ferma eshkimdi alǵysy kelmeidi. Sebebi artyq aqsha tólegisi joq. Sondyqtan bunyń eki jaǵy bar. Eki jaǵynyń da sheshimi bar. Qazir biz aýyl sharýashylyǵyna jyl saiyn mamandardy jiberip jatyrmyz. Olarǵa kóterińki jalaqy berilýde. Aýyl sharýashylyǵynda óńdeý indýstriiasy kóteriler bolsa, jumys bolady», - dedi Elbasy «Habar» arnasyna bergen suhbatynda.
Úzdik aýyl sharýashylyǵy ónimin óndirýshiler retinde Nursultan Nazarbaev SQO-daǵy «Zenchenko» zaýytyn, Aqmola oblysyndaǵy «Rodina» aýylyn úlgi etti.
«Jastardyń barlyǵy sol aýyldaǵy jumys ornynda qalǵysy keledi. Onda jastarǵa úi beredi, oqytady. Ol jaqtaǵy jastardyń qalada úii nemese jumysy bolmasa, alyp shaharda olar ne isteidi?! Sondyqtan, aýyl sharýashylyǵynda jumys istep júrgen azamattar jastardy sol jerge tartýy kerek. Keibireýler qalada, keibiri aýylda turǵysy keledi. Biz aýyldan shyqqan balalar bolǵandyqtan, aýyldy ańsaimyz ǵoi. Búgin «Egemen Qazaqstan» gazetinde jýsan týraly úlken maqala shyǵypty. Jýsannyń iisi adamnyń denesin sergitedi dep jazypty. Shynynda da, aýylǵa barsań, bir túp jýsandy julyp alyp, iiskeisiń. Iisi ańqyp turady», - dedi ol.
Nursultan Nazarbaev osy rettte Sultan Beibarys týraly filmdi eske aldy.
«Aýyl degen – bárimizdiń besigimiz. Aýylǵa degen qamqorlyqty memleket nazarda ustaýy kerek. Jaǵdai jasaýy kerek. Tehnikany alsyn, tyńaitqyshtardy kóbirek shyǵaryp, ónimdilikti arttyryp, az adammen kóp ónim shyǵaratyn jaǵdaiǵa jetýi kerek. Odan qorqýǵa bolmaidy. Ýrbanizatsiiany eshkim toqtata almaidy», - dedi Nursultan Nazarbaev.
.jpeg)