Mianmanyń soltústik-shyǵysynda joiqyn jarylys bolyp, keminde 46 adam qaza tapty, dep habarlaidy ult.kz.
Qaiǵyly oqiǵa 31 mamyr kúni Mianmanyń Shan shtatyndaǵy Namhkam okrýgine qarasty Kaýngtýp aýylynda boldy. Aldyn ala málimetter boiynsha, jarylys taý-ken óndirisinde qoldanylatyn jarylǵysh zattar saqtalǵan ǵimaratta bolǵan.
Halyqaralyq aqparat agenttikteriniń habarlaýynsha, apat saldarynan keminde 46 adam kóz jumyp, taǵy 70-ten astamy túrli jaraqat alǵan. Qaza bolǵandardyń arasynda alty balanyń bar ekeni aityldy. Zardap shekkender jergilikti aýrýhanalarǵa jetkizilip, qutqarý jumystary áli de jalǵasyp jatyr.
Jarylys Qytai shekarasynan shamamen 3 shaqyrym jerdegi eldi mekende bolǵan. Apattan keiin jaqyn mańdaǵy 100-den astam turǵyn úi zaqymdanyp, keibiri tolyq qiraǵan. Oqiǵa ornynan túsirilgen kadrlarda qoiý tútin men úiindilerdiń kóp bolǵany baiqalady.
Jergilikti bilik pen qutqarýshylardyń málimetinshe, qoimada gelignit dep atalatyn óndiristik jarylǵysh zat saqtalǵan bolýy múmkin. Mamandar bul zattyń uzaq ýaqyt durys saqtalmaýy nemese qaýipsizdik talaptarynyń buzylýy jarylysqa sebep bolýy yqtimal ekenin aitýda.
