ميانمانىڭ سولتٷستٸك-شىعىسىندا جويقىن جارىلىس بولىپ, كەمٸندە 46 ادام قازا تاپتى, دەپ حابارلايدى ult.kz.
قايعىلى وقيعا 31 مامىر كٷنٸ ميانمانىڭ شان شتاتىنداعى نامحكام وكرۋگٸنە قاراستى كاۋنگتۋپ اۋىلىندا بولدى. الدىن الا مەلٸمەتتەر بويىنشا, جارىلىس تاۋ-كەن ٶندٸرٸسٸندە قولدانىلاتىن جارىلعىش زاتتار ساقتالعان عيماراتتا بولعان.
حالىقارالىق اقپارات اگەنتتٸكتەرٸنٸڭ حابارلاۋىنشا, اپات سالدارىنان كەمٸندە 46 ادام كٶز جۇمىپ, تاعى 70-تەن استامى تٷرلٸ جاراقات العان. قازا بولعانداردىڭ اراسىندا التى بالانىڭ بار ەكەنٸ ايتىلدى. زارداپ شەككەندەر جەرگٸلٸكتٸ اۋرۋحانالارعا جەتكٸزٸلٸپ, قۇتقارۋ جۇمىستارى ەلٸ دە جالعاسىپ جاتىر.
جارىلىس قىتاي شەكاراسىنان شامامەن 3 شاقىرىم جەردەگٸ ەلدٸ مەكەندە بولعان. اپاتتان كەيٸن جاقىن ماڭداعى 100-دەن استام تۇرعىن ٷي زاقىمدانىپ, كەيبٸرٸ تولىق قيراعان. وقيعا ورنىنان تٷسٸرٸلگەن كادرلاردا قويۋ تٷتٸن مەن ٷيٸندٸلەردٸڭ كٶپ بولعانى بايقالادى.
جەرگٸلٸكتٸ بيلٸك پەن قۇتقارۋشىلاردىڭ مەلٸمەتٸنشە, قويمادا گەليگنيت دەپ اتالاتىن ٶندٸرٸستٸك جارىلعىش زات ساقتالعان بولۋى مٷمكٸن. ماماندار بۇل زاتتىڭ ۇزاق ۋاقىت دۇرىس ساقتالماۋى نەمەسە قاۋٸپسٸزدٸك تالاپتارىنىڭ بۇزىلۋى جارىلىسقا سەبەپ بولۋى ىقتيمال ەكەنٸن ايتۋدا.
