Úkimet aýyldyq aimaqtardy damytý baǵdarlamasynyń tujyrymdamasyn túbegeili qaita qarastyrýy qajet. Bul týraly Senat depýtaty Aqylbek Kúrishbaev málim etti, dep habarlaidy QazAqparat.
«Aýyldyq aimaqtardy damytý jumystaryn tiimdi júrgizý úshin tiisti usynystardy eńgizemiz. Birinshiden, Úkimet aýyldyq aimaqtardy damytý baǵdarlamasynyń tujyrymdamasyn túbegeili qaita qarastyrýy qajet. Osy oraida eń aldymen, aýyldyq aimaqtardy damytý baǵytyn jeke qujatpen ulttyq joba retinde qabyldaý jón bolar edi. Ekinshiden, aýyldyq aimaqtardy damytý máselelerin basqarýdy Ulttyq ekonomika ministrligi qaramaǵynan alyp Aýyl sharýashylyǵy ministrligine berý kerek. Sebebi aýyl óndirisi men aýyldyq turǵyndarǵa ońtaily jaǵdai jasaý ortaq máseleniń quramdas bóligi jáne ony bólip-aiyrýdyń qajeti joq. Sonymen qatar, bul – búkil álemdik tájiribe. Eýropanyń kóptegen memleketterinde, Kanada, Aýstraliia, Resei jáne Belarýs sekildi agrarlyq elderde aýyldyq jerlerdi damytý máselesimen Aýyl sharýashylyǵy ministrligi ainalysady», - dedi Kúrishbaev Senattaǵy aýyldyq aýmaqtardy damytý jónindegi parlamenttik tyńdaýda.
Onyń paiymynsha, ulttyq jobany qarjylyq qamtamasyz etý qaǵidattaryn túbegeili qaita qarastyrǵan jón. Bul jerde aýyldyq jerlerdiń infraqurylymyn damytý protsesine qatysqan memlekettik emes qurylymdardyń shyǵyndaryn sýbsidiialaý arqyly osy iske jeke kapitaldy barynsha tartýdyń mańyzy asa zor.
«Aýylsharýashylyq óndiristi, aýyldyq aimaqtardy damytý úshin aýyl biznesin qoljetimdi uzaq merzimdi nesiemen qamtamasyz etý óte mańyzdy. «Báiterek» jáne «QazAGRO» holdingteri birikkennen keiin, olardyń basty qyzmet etý nysany aýyl men aýyl sharýashylyǵy bolady degen úmittemiz. Ol úshin jańa qarjy júiesiniń negizgi quryltaishysy Aýyl sharýashylyǵy ministrligi bolý kerek dep sanaimyz. Qosalqy sharýashylyqtardyń kooperatsiiasyn, aýyldaǵy mal basyn jaiylym jáne jem-shóppen qamtamasyz etý máselesin túbegeili túrde sheshý qajet. Biylǵy joldaýynda Prezident osy suraqtarǵa qatysty jáne 1 mln aýyl turǵyndarynyń tabysyn turaqty túrde kóterý týraly naqty tapsyrma bergen bolatyn», - dedi senator.
