Aýyl sharýashylyǵy tehnikasy baǵasynyń qymbattaýyna ýtilalymnyń qatysy joq. Bul týraly QR Indýstriia jáne infraqurylymdyq damý vitse-ministri Marat Qarabaev aitty, dep habarlaidy QazAqparat.
«Aýyl sharýashylyǵy óndirisimen ainalysatyn áriptesterimiz, osy saladaǵy mamandar aýyl sharýashylyǵy tehnikasy qunynyń ýtilalym kesirinen qymbattap bara jatqany týraly birneshe ret másele kóterdi. Bul da shyndyqqa jatpaidy. Eń aldymen statistikaǵa júgineiik. Byltyr elimizde qansha traktor, kombain satylǵan bolsa, sonyń 89 paiyzy otandyq óndiriske tiesili. Iaǵni, aýyl sharýashylyǵyna qajetti traktor men kombain satyp alǵan kásipkerlerdiń 89 paiyzy kádege jaratý alymyn tólemedi. Bul resmi derek, resmi statistika», - dedi vitse-ministr Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, sheteldik tehnikany shyǵaratyn sheteldik kompaniianyń óndiris oshaǵy Qazaqstanda ornalassa, onda qurastyrylǵan tehnikalardan ýtilalym alynbaidy.
«Aýyl sharýashylyǵynda Belarýstyń MTZ traktoryna suranys óte joǵary. MTZ bizge kelip zaýytyn ashty. Tipti ári qarai lokalizatsiiaǵa baryp, kabinasyn ózimizde tolyǵymen shyǵaryp, Belarýsqa eksportqa jiberemiz. Belarýsta kabinasy shyǵarylmaidy. Sonymen qatar Lovol, Kirevets, YTO traktorlaryna suranys bar. Iaǵni, halyqtyń suranysyna ie aýyl sharýashylyǵy tehnikasynyń bári ózimizde qurastyrylady. Osy tehnikalardy satyp alý barysynda eshqandai ýtilalym tólenbeidi», - dedi Marat Qarabaev.
