«Aýyl» halyqtyq demokratiialyq patriottyq partiiasynyń tóraǵasy Áli Bektaev Memleket basshysynyń búgin joldaǵan úndeýine pikir bildirdi, dep habarlaidy QazAqparat.
«Memleket basshysy Qasym-Jomart Toqaev búgin QR Parlamenti Májilisi jáne máslihat depýtattary sailaýyn ótkizý sheshimin jariia etti. Bul sheshimdi «Aýyl» partiiasy tolyq qoldaidy. Oǵan birneshe sebep bar. Birinshiden, qazirgi jasalyp jatqan qadam koronavirýs pandemiiasynda bolyp jatqan qiyndyqtarǵa qaramastan qazaqstandyqtarǵa óz konstitýtsiialyq sailaý quqyǵyn paidalanýǵa múmkindik beredi. Ekinshiden, bul sailaý erte emes, kesh emes, óziniń konstitýtsiialyq merziminde óteiin dep jatyr. Onyń óz erekshelikteri bar, partiialar úshin de, sailaýǵa qatysatyn barlyq elektorat úshin de zańǵa sáikes tolyq daiyndyqqa da, qatysýǵa da, daýys jinaýǵa da múmkindik beriledi degen sóz», - dedi Áli Bektaev elordada tilshilerge bergen suhbatynda.
Sonymen birge, partiia tóraǵasy bul sailaýda kóptegen ózgerister oryn alǵanyn eske saldy.
«Birinshiden, Qazaqstanda alǵash ret 30 paiyzdyq áielder men jastar kvotasy engeli otyr. Muny da jastar men áielder úshin óte úlken másele dep esepteimiz. Ekinshi másele – tiisti zańdarǵa Parlament ishindegi oppozitsiia týraly, olardyń quqyqtary men múmkindikteri tolyq jazylǵan ózgeris engizildi. Úshinshi jańalyq – jergilikti jerlerdegi máslihat depýtattary da partiialyq tizimmen sailanatyn bolady. Iaǵni, burynǵydai bir partiianyń tizimindegi adamdar emes, basqa da partiialardyń músheleri jergilikti máslihattarda óz daýsyna ie bolyp, jergilikti problemalardy sheshýge atsalysa alady. Biylǵy sailaýdyń osyndai erekshelikteri kóppartiialy Parlamentti jasaqtaýǵa múmkindik beredi dep senemiz. Ol úshin sailaý men daýys sanaǵy kezinde tazalyq pen ádildik kerek. Bul máseleni de Prezident óz baqylaýyna alyp otyr», - deidi Á. Bektaev.
«Aýyl» partiiasynyń quramynda jastar men áielderdiń úlesi 42 paiyzdy quraidy.
«Aldaǵy ýaqytta partiianyń sezi sailaýǵa qatysý týraly sheshim qabyldap jatsa, partiia músheleri arasynan zańǵa sáikes 30 paiyz kóleminde jastar men áielderdi taýyp, dodaǵa qosa alamyz dep oilaimyn. Osynyń barlyǵyn eskere otyryp, «Aýyl» partiiasy bul sailaýmen kóp máseleni bailanystyrǵysy kelip otyr. «Aýyl» partiiasynda da depýtat bolyp, halqy úshin qyzmet etýge daiyn azamattar, aýylmen óz taǵdyryn bailanystyryp júrgen tulǵalar kóp. Menińshe, bul sailaý kóptegen partiialar úshin, sailaýshylar úshin tarihi mańyzdy kezeń bolǵaly tur», - dedi Áli Bektaev.
Sailaýǵa qatysý úshin partiianyń óz baǵdarlamasy bolady, ol partiianyń aldaǵy sezinde qabyldanady. Sol platformada partiianyń naqty josparly jumystary jariialanady.
«Negizgi basymdyq árine aýyl sharýashylyǵy men aýyl turǵyndarynyń turmys-tirshiligine túsedi. Sebebi, ol jerde sheshiletin másele kóp. Aýyl sharýashylyǵy qazir aldyńǵy qatarǵa shyǵyp tur, agrarlyq sektordyń eń qajetti sala ekenin qazirgi pandemiianyń ózi kórsetti. Azyq-túliksiz ómir joq, azyq-túliksiz densaýlyq joq. Olai bolsa, qymbat kólikten, qymbat úiden jáne qymbat sharalardan góri taza organikalyq azyq-túliktiń kóp bolýy halqymyz úshin áldeqaida paidaly. Ol úshin aýyl sharýashylyǵy jumys isteýi kerek», - dedi Áli Bektaev.
Budan deiin habarlanǵandai, Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialady.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy. Ortalyq sailaý komissiiasy men Bas prokýratýra sailaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady», - dedi Prezident.
