Májilis depýtaty Áliia Saparova aýdandyq mańyzy bar qalalarǵa aýyl mártebesin berýdiń arqasynda aýyldyń biýdjettik qyzmetkerleriniń ailyǵy kóbeietinin málimdedi, dep habarlaidy "Ult aqparat".
Eske sala ketsek, Májilis depýtaty Áliia Saparova Parlament Májilisinde «QR-nyń keibir zańnamalyq aktilerine óńirlerdiń ákimshilik-aýmaqtyq qurylysyn jetildirý máseleleri boiynsha ózgerister men tolyqtyrýlar engizý týraly» zań jobasyn tanystyrǵan bolatyn. Zań jobasyna sáikes elimizdegi 13 aýdandyq mańyzy bar qalaǵa aýyl mártebesi beriledi.
Zań jobasyn talqylaý barysynda Amangeldi Dáýrenbaev bul ózgeristerden turǵyndardyń áleýmettik-ekonomikalyq jaǵynan ne utatynyn surady. Óz kezeginde Áliia Saparova aýdandyq mańyzy bar qalalardyń (keiin aýyl mártebesine ózgeretin) qazirgi turǵyndary qandai artyqshylyqqa ie bolatynyn naqty aityp berdi.
«Aýdandyq mańyzy bar qalaǵa aýyl mártebesi berilse birinshiden aýyldarda eńbek etetin densaýlyq saqtaý, mádeniet, bilim, áleýmettik qamsyzdandyrý, sport salasyndaǵy qyzmetkerlerdiń jalaqysyna 25 paiyzdyq ústemeaqy qosylady. Ekinshiden aýyldaǵy mektepterdiń túlekterine oqýǵa túsý úshin qabyldaý kvotasy qarastyrylǵan. Sondai-aq aita keterligi, osyndai baǵdarlamalardyń biri – «Diplommen aýylǵa» baǵdarlamasy aiasynda aýyldy eldimekenderge kelip jatqan jas mamandarǵa memlekettik qoldaý kórsetiledi. Atap aitqanda olarǵa kóterme járdemaqy men turǵyn úi alý úshin biýdjettik nesie beriledi», - dedi ol.
Áitse de, óz kezeginde Ulttyq ekonomika vitse-ministri Ermek Alpysov aýdandyq mańyzy bar qalalarǵa aýyl mártebesin berý máselesi tek turǵyndardyń jiyny arqyly sheshiletinin, iaǵni sondaǵy halyqtyń pikiri eskeriletinin málimdedi.
