Jeksenbi, 17 qańtar kúni tańerteń Kabýlda belgisiz bireýler Aýǵanstan joǵarǵy sotynda jumys isteitin eki áiel sýdiany atyp óltirdi. Bul týraly jergilikti politsiiaǵa siltei otyryp Reuters agenttigi habarlady.
Politsiia málimdemesine qaraǵanda, aty-jóni áli atalmaǵan eki sýdiaǵa shabýyl tańǵy 8:30 ýaqytynda jasalǵan. Sýdialardyń ekeýi de qaitys bolǵan, kólik júrgizýshisi jaraqat alǵan.
Taliban qozǵalysynyń baspasóz hatshysy sodyrlardyń bul qastandyqqa qatysy joǵyn aitty.
Aýǵanstanda keiingi ailarda Taliban men úkimet arasyndaǵy bitimgerlik kelissózderiniń júrip jatqanyna qaramastan qastandyq jasaý kóbeidi. Shabýyldar el astanasy Kabýlda jii baiqalyp otyr. Laýazymdy tulǵalardyń qastandyqpen óltirilýi el arasynda úrei týdyryp otyr. Shabýylǵa tap bolyp jatqandardyń kóbi – jýrnalister, adam quqyǵyn qorǵaý jónindegi belsendiler, óner qairatkerleri jáne qoǵamdyq ispen ainalysatyn áielder.
Munyń aldyndaǵy shabýyl Pentagon Aýǵanstandaǵy áskerin 2,500 sarbazǵa deiin qysqartatynyn málimdegen soń eki kúnnen keiin boldy. El prezidenti Ashraf Gani bul shabýyldyń artynda Taliban tur dep málimdedi.
