.webp)
Oral qalasynyń qos turǵyny, egizder – Záýre men Zere Amerikadaǵy til mektebinen Astana arqyly keri ushyp shyqqan. Elordaǵa aman jetken qos jasóspirimniń biri Astana - Oral baǵytynda ushqan «FlyArystan» áýekompaniiasynyń ushaǵynan qalyp qoiǵan. Bul týraly egizderdiń anasy Jazira Mýsina óziniń áleýmettik paraqshasyna jazdy.
Anasynyń aitýynsha, 12 jasar balalar 20 shilde kúni senip tapsyrylǵan tulǵanyń jetekshiligimen Niý-Iork qalasynan Astanaǵa baǵyt alǵan ushaqpen ushyp kelgen. 21 shilde kúni tańda ushaq Astana qalasyna qonǵan. Jospar boiynsha sol kúni tústen keiin Oralǵa ushatyn reiske otyrýy tiis bolǵan. Alaida, «FlyArystan» áýekompaniiasy qyzmetkerleriniń salǵyrttyǵy saldarynan, egizderdiń bireýi áýejaida qalyp qoiǵan.
«FlyArystan» áýekompaniiasynyń qyzmetkerleri tek Záýreni tirkep, tehnikalyq aqaýdy syltaýratyp, Zereni tirkemegen. Balalarǵa jaýapty tulǵaǵa Zereni ózderi ushaqqa otyrǵyzatynyn aitqan. Nátijesinde bári ushyp ketedi de, Zere áýejaida qalyp qoiǵan», — dep jazdy anasy.
Zere osylaisha, eki chemodany men qujatyn qushaqtap, Astana áýejaiynda jalǵyz qalǵan.
Anasynyń habarlaýynsha, bul jańalyqty estigen boida ol tiisti mekemelerge qońyraý shalyp, habarlasa bastaǵan. Áýekompaniiasy Zereni qonaqúige ornalastyrý týraly usynys aitqan. Alaida, qyzynyń qaýipsizdigine alańdaǵan ana usynystan bas tartyp, týysqandarynan kómek suraǵan. Erteńinde tańda Zere eshbir jetelegen adamsyz ózi Oralǵa ushqan.
Jazira Mýsina birden qorǵaýshy taýyp, Azamattyq aviatsiia komitetine shaǵym túsirgen. Bala quqyǵy, áýekompaniianyń jaýapkershiligi máselesin alǵa tartqan.
Búgin «FlyArystan» áýekompaniiasy kámeletke tolmaǵan jolaýshyny reiske jibermeý jónindegi aqparatqa qatysty túsinikteme berdi.
«Azamattyq aviatsiia komiteti «FlyArystan» aviakompaniiasyn kámeletke tolmaǵan jolaýshyny aviakompaniianyń reisine jibermegeni úshin ákimshilik jaýapkershilikke tartady. Bul óreskel jaǵdai. Jolaýshylardyń quqyǵy árqashan múltiksiz saqtalýy kerek. Azamattyq aviatsiia komiteti, «Qazaqstannyń aviatsiialyq ákimshiligi« AQ-men birlese «FlyArystan» aviakompaniiasyna qatysty jan-jaqty tekserý júrgizedi. Kináli qyzmetkerler mindetti túrde jaýapqa tartylady», — delingen habarlamada.
