Aýdandyq gazet, ahýalyń qalai?

«Daýdyń basy – Dairabaidyń kók siyry» demekshi, aýdandyq gazet­terdiń jai-jaǵ­daiy týraly máse­le biyl seksen jyldyq merei­toiyn toilaityn Almaty obly­sy­nyń Na­ryn­qol aýdan­dyq «Hantáńiri» gaze­ti­niń problema­synan bastalǵan edi. Gazet mereitoiyn toilamaq túgili, jabylýdyń az-aq aldynda turǵan kórinedi. Kezinde klassik jazýshy Berdibek Soqpaqbaev, aqiyq aqyn Muqaǵali Maqataev, Memlekettik syilyqtyń laýreaty, jazýshy Baqqoja Muqai syndy qalamgerlerdiń shyǵarmashylyq shabytyn mazdatqan, qýat bergen aýdandyq gazettiń qazirgi hali múshkil. Bul jóninde respýblikalyq «Altyn qalam» ádebi baiqaýynyń júldegeri Berkin Ákebaev dabyl qaǵady.

«Hantáńiri» gazeti týraly problema «Egemenniń» menshikti tilshilerine basqa aýdandyq gazetterdiń ahýaly tóńireginde zertteý júrgizýge túrtki boldy. Basylym oqyrmanynyń maqalasyna qosa, búgin eki aimaqtan jazylǵan saraptamany oqyrman nazaryna usynyp otyrmyz.

Basshylar BAQ-ty baǵalai bilse…

Torǵai kentiniń qart turǵyny Jumaqan Sádýaqasov aqsaqal «Bizdiń Torǵai» gazeti keshikse izdei bastaidy, redaktsiiaǵa qońyraý shalady nemese taiaǵyna súienip ózi keledi. Ǵumyr boiy aýdandyq gazetti jazdyryp alatyn ol gazet keshikse bir zaty joǵalǵandai mazasyzdana bas­taidy. Gazetten týǵan jerdiń tarihy, Torǵai jerindegi kóz kórgen igi jaqsylar, halqynyń dástúri men salty, jastardyń tárbiesi týraly jyly maqala oqysa kádimgidei sergip qalady. «Aýdan ákimi ne bitirip jatyr eken, kim kelipti, kim qoiypty?» degen sipattaǵy aqparattarǵa da eleńdeidi. Redaktor Gúlim Smaǵul qart oqyrmanǵa gazettiń keshigý sebebi, ony jetkizetin «Qazposhta» qyzmetine bailanys­ty ekenin túsindirip, jyly sózimen shyǵaryp salady.

«Bizdiń Torǵai» gazetiniń redak­tsiiasyndaǵy býhgalterdi qospaǵanda redaktor, bir tilshi, betteýshi jáne hatshy bal jinaǵan aradai júgirip, jaiaý-jalpylap maqalaǵa ózek bolatyn aqparatty izdeidi. Ótken jyly kúzde gazet jartylai jekeshelendirilgen bolatyn. Degenmen áli aýdan ákimdiginiń tolyq qoldaý-kómegimen shyǵyp otyr. Taralymy ótken jyly 1,5 myń dana boldy. Bul aýdan turǵyndarynyń jalpy sanyna shaqqanda on paiyzdy quraidy. Jankeldin aýdanyndaǵy eldi mekender Torǵai kentinen eń kem degende 30-40 shaqyrym, tipti kópshiligi 70-100 shaqyrymda jatyr. Gazetti «Qazposhtanyń» aýdandyq, aýyldyq bólimsheleri jetkizedi. Redaktor Gúlim Smaǵuldyń aitýyna qaraǵanda, gazet oqyrmanyna bir aptanyń ishinde jetse – kóńilge demeý.

Oblystaǵy aýdandyq, qalalyq basylymdar arasynda «Bizdiń Torǵaidan» bólek kórshi Amangeldi aýdandyq «Amangeldi araiy» gazeti taza qazaq tilinde shyǵady. Onyń taralymy búginde 1800 danany quraidy. Aýdannyń halqy qazir 17 myńnan asady.

– Aýdanda 2400-dei otbasy bar. Bir úide birneshe oqyrman bar dep esepteimiz, sondyqtan biz qazir oqyrmandarymyzdy jarydan aýa qamtyp otyrmyz. Biylǵy baspasózge jazylý naýqanynda taralymdy 2200-ge jetkizý oiymyzda bar, – deidi gazet redaktory Hamitbek Musabaev. Ótken jyly jaýapkershiligi shekteýli seriktestigine ainalyp, gazet tolyq jekeshelendirýge kóshti.

– Alǵashqyda gazettiń jeke­shelen­dirilýinen qorqa tartqanbyz. Qazir biz túsindik, redaktsiia ujymynda «gazet – asyraýshymyz» degen túsinik basymdyqqa ie bolyp kele jatyr. Sol úshin ujymdaǵy bes adam tynbaimyz, izdensek ǵana tabys keledi, – deidi redaktor. Degenmen, gazettiń menshik formasy ózgergenimen, jaǵdaidyń burynǵydan asa ózgerip ketpegeni baiqalady. Gazetke tabys taralymy, jarnama jáne aýdan ákimdiginiń ishki saia­sat bólimi jasaǵan memlekettik tapsyrysy arqyly keledi. Osy qarajat­tyń barlyǵyn qosqanda ýaqyt talabyna, oqyrman talǵamyna sai basylymnyń dizainyn durystaý, saitty jolǵa qoiý, bet sanyn kóbeitý, kadr biliktiligin kóterý sekildi gazettiń zamanaýi silkinýine mursha kelmei otyr. Aýdan negizinen mal sharýashylyǵy, onda da maldyń kóbi jeke sektorda. Sondyqtan gazetke habarlandyrý, quttyqtaý, kóńil aitý sekildi usaq-túiekten ǵana aqsha túsedi. Hamitbek Musabaevtyń aitýynsha, gazet materialdary da jergilikti oqyrmannyń kóńil qalaýyn eskeredi. Negizinen 8 jáne ishinara 12 bet bolyp shyǵady.

Torǵai óńirindegi osy eki basylymnan basqa Qostanai oblysynyń aýdandary men qalalaryndaǵy gazetter negizinen orys jáne qazaq-orys tilderinde basylady. Qalalardy aitpaǵanda, aýdandyq gazetterdiń eń kóp taralymy 4800 danany quraidy. Al óndiristi Rýdnyi qalasyndaǵy «Rýdnenskii rabochii», «Magnetit» gazetteriniń taralymy 13-17 myńǵa jetip jyǵylady. Oblys attas Qos­tanai aýdandyq «Arna» gazeti 3500 taralymy bar aýdandyq iri gazettiń biri. Aptasyna bir ret 16 betpen, qajet kezderi 32 betpen shyǵady. Alaida oblys ortalyǵynyń irgesindegi aýdan halqynyń sany 70 myń shamasynda ekenin eskersek, gazet taralymy onyń on paiyzyn da ala almai otyr. Gazet redaktory Jumakúl Erqasymova bul jaǵdaidyń birneshe sebepterin alǵa tartty.

– Gazetti basqarǵanyma on bes jyl boldy. Osy ýaqyt ishinde baiqaǵanym, jyl saiyn merzimdi basylymǵa jazylý kórsetkishi tómendep keledi. Onyń basty sebebiniń biri – adamdardyń gazetke qyzyǵýshylyǵy, oqýy nasharlap ketti. Saýalnama júrgizgenimizde olardyń basym kópshiligi gazetti onyń elektrondyq nusqasynan oqyp otyratynyn aitty. Gazettiń saityn tek qostanailyqtar ǵana emes, shetelden, Reseiden, Belorýssiiadan, Germaniiadan qaraityndar bar. Bizdiń baiqaýymyzsha, jyl saiyn bizdiń saitqa kiretinder sany artyp keledi. Bul bir jaǵynan qýanyshty da shyǵar, ekinshi jaǵynan ókinishti. Sebebi saittyń oqyrmany kóbeigenimen, biz odan tabys taýyp otyrǵanymyz joq, – deidi redaktor Jumakúl Maratqyzy. Oblys ortalyǵyna jaqyn aýdan bolsa da gazettiń tabysy taralymnan jáne aýdan ákimdigi jasaǵan memlekettik suranystan túsedi. Iri aýdan bolǵanymen gazet jarnamaǵa jarymaidy.

– Qazir kásipkerler de, kásip­oryn­dar, jalpy biznes salasynda­ǵylar jarnamanyń ózderine arzan túsetin túrlerin taýyp alǵan. Habarlandyrýlaryn, jarnamalaryn ózderiniń saityna ornalastyrady, kóshege iledi, júrginshilerge paraqshalar taratady, áiteýir gazetke berýge yqylasty emes, – deidi redaktor. Jalpy oqyrmandardy tartý gazet redaktsiiasynyń kún tártibinen, is-josparynan túspeidi.

Aýdandyq gazetterdiń kópshiligi sekildi «Arna» gazeti de taralymnyń azdyǵyn «Qazposhta» qyzmetiniń nasharlyǵyna saiady. Aýyldarda poshta qyzmetkeri kúni boiy otyr­maityndyǵyn, gazetterdiń ýaqytyly jetkizilmeitindigin aitady. Bul endi tek aýdandyq gazetter úshin ǵana emes, barlyq basylymdardyń basynda bar, aityla-aityla jaýyr bolǵan másele. Qys ailarynda basylymdardy eldi mekenderge jetkizý tipti baiaýlaidy. Qandai menshik túrinde bolsa da, aýdandyq, qalalyq gazetterdiń aýdan ákimdigimen «ilegeni bir teriniń pushpaǵy», sol óńirdiń muńyn muńdaidy, jyryn jyrlaidy. Muny túsingen ákimder aýdandyq, qalalyq gazetterge qol­daý-kómegin kórsetip, birlesip ju­mys istep otyr. Ondai gazetterdiń jaǵdaiy da jaman emes. Mysaly, Taran aýdandyq «Shamshyraq-Maiak» gazetiniń taralymy sońǵy jyldary 2600 danadan 3500-ge bir-aq kóterildi. Gazettiń jyldyq biýdjeti eki esege jýyq ósti. Redaktsiia ujymy otyratyn ǵimarat eýrojóndeýden ótkizildi. Jýrnalister sany artty, ózge aýdandyq gazetter redaktordan bólek bir ǵana tilshi ustasa, munda 5 jýrnalist qyzmet etedi. Kólik bergen. Osyǵan sáikes aýdan ákimi Baqbergen Óteýlinniń de talaby bar. Ol jýrnalisterden aýdan ómirin shynaiy kórsetýdi, usaq kemshilikterge deiin jazýdy usynady.

– Ákim «aýdandyq gazet – aýdan­nyń ainasy bolýy, onyń nazarynan eshteńe syrt qalmaýy tiis» dep, syn materialdarǵa kóńil bólýdi tapsyrady. Syn materialdarǵa, oqyrmandar gazetten saýǵa surap jazǵan shaǵymdarǵa aýdandyq prokýratýranyń nazaryn aýdaryp otyramyz. Gazet kótergen máseleniń nátijesi bolýy kerek, – deidi redaktor Aibatyr Ahmetbekov. «Arna» jalqy emes, oblysta sapasy, taralymy, dizainy, mazmuny, tipti jarnama tartý jaǵynan áriptesterinen oq boiy alda kele jatqan Qarabalyq aýdandyq «Aina» gazetin oqyrmandar izdep oqidy. Alaida oblystaǵy aýdandyq gazetterdiń barlyǵy birdei mundai emes, keibir aýdandyq gazetter áli de jupyny. Mysaly, Qamysty aýdandyq «Qamysty jańalyqtary» gazeti 650 danamen taralady. Mundai taralymy az, áljýaz basylym Elbasynyń saiasatyn, eldi ekonomikalyq damytý baǵdarlamalaryn, aýdan ákiminiń jasap jatqan isterin oqyrmanǵa qalai jetkizedi?

Jalpy, oblysta 30 aýdandyq-qalalyq merzimdi basylym shyǵyp turady. Onyń 23-i saiasi-qoǵamdyq gazetter de, qalǵan 7-ýi jarnamalyq basylymdar. Kadrlarmen qamtamasyz etý, gazetterdi eldi mekenderge ýaqytyly jetkizý aýdandyq basylymdardyń ortaq problemasyna ainalǵan. Eki tilde shyǵatyn aýdandyq, qalalyq gazetterde memlekettik tildegi maqalalar tym az, qorash. Maqtaýyn keltirgen «Aina» gazetiniń ózi qazaq tilindegi maqalalar men aqparattardy bir betten asyrmaidy. Kadr joq deidi. Biyl A.Baitursynov atyndaǵy Qostanai memlekettik ýniversitetin jýrnalis­tika mamandyǵy boiynsha orys jáne qazaq toptarynda 35 túlek bitirdi.

– Jyl saiyn túlekterdiń shamamen 80 paiyzy jumysqa mamandyǵy bo­iynsha ornalasady. Alaida aýdandarǵa jastardyń ilýde bireýi ǵana barady. Jitiqara, Lisakov, Rýdnyi, Arqalyq qalalaryna barýǵa niet etkender tym sirek. Túlekterdiń barlyǵy Astana jáne basqa qalalarǵa ketedi, oblys ortalyǵynda qalady. Óitkeni jas jýrnalisterdi jaǵdai jasap shaqyrǵan aýdan ákimderin áli kezdestirgen joqpyz, – deidi jýrnalistika kafedrasynyń meńgerýshisi Almatai Júsipova.

Aýdandyq, qalalyq gazetter oqyrman talǵamyna tolyq sai bolýy úshin ol oqyrmannyń sońynda emes, aldynda júrýi tiis. Ýaqyt, qoǵam tynysyn dóp basqanda ǵana oqyrman gazetti izdeitinin biz tildesken re­dak­­torlardyń ózderi de aitty. Taralym kóbeigen saiyn gazettiń tabysy da artady. Gazetke qansha materialdyq jaǵdai jasalǵanymen, onyń mazmundyq sapasyn kóteretin tek maman jýrnalister ekeni belgili.

Názira JÁRIMBETOVA

«Egemen Qazaqstan», Qostanai oblysy

Basylym da zamanǵa sai bolýy tiis

Jasyratyny joq, Jambyl oblysy buqaralyq aqparat quraldary sany jaǵynan maqtana almaidy. Nebári 170 shaqyrym qashyqtyqta jatqan shyraily Shymkent shaharyndaǵydai ai saiyn bir gazet ashylyp, aqparat maidany qyp-qyzyl órt bolyp jalyndap jatqan joq. Ras, oblys ortalyǵynda birdi-ekili táýelsiz gazetter bar. Olardyń kóbisi orys tilinde jáne negizinen jarnama taratýdyń arqasynda kúneltip otyr. Al aýdandarǵa keler bolsaq, búginde tek Merki aýdanynda ǵana eki-úsh jekemenshik gazet-jýrnal jaryq kóredi.

Bir jaqsysy, naryqtyń qandai qiyn kezeńderinen ótse de, aýdandyq gazetter jabylyp qalǵan joq. Shtaty qysqardy, taralymy azaidy, orys-qazaq redaktsiialary qosylyp ketti, áiteýir bul basylymdar qandai tar jol, taiǵaq keshýden ótse de aýdannyń tynys-tirshiligin buqaraǵa jetkizýden esh jańylǵan emes. Áitse de sońǵy jyldary «Aýdandyq gazetter jekemenshikke satylady eken» degen áńgimeniń qoiýlana bastaǵany ras. Alǵashynda «Áreń-áreń kúneltip otyrǵan aýdandyq basylymdarda qandai paida bar? Eshqandai kásipker satyp almaityn shyǵar-aý…» degender de bolǵan. Biraq naryq óz degenin isteidi eken. Búginde Jambyl oblysyndaǵy barlyq aýdandyq gazetterde jekemenshiktiń úlesi bar.

Atap aitar bolsaq, Qordai, T.Rysqulov, Merki, Baizaq, Talas, Moiynqum, Shý, Jýaly, Jambyl aýdandyq gazetteriniń 51 paiyz úlesi jergilikti qarjy bóliminiń menshiginde bolsa, qalǵan 49-y jeke kásipkerlerdiń ieliginde. Tek Sarysý aýdany men Taraz qalasynyń ákimdigi óz qoldarynda gazettiń 90 paiyz úlesin ustap otyr. Taralym jaǵyna keletin bolsaq, Taraz qalalyq jáne Talas, Qordai aýdandyq gazetteri 9 myńnan astam tirajben jaryq kórip jatsa, qalǵandarynyń eki jarym men bes myńnyń arasynda oqyrmandary bar.

Árine, aýdandyq gazetter jaǵdaiynyń jaqsy-jaman bolýy sol aýdan ákiminiń basylymǵa degen kózqarasyna tikelei bailanysty ekenin jasyrýǵa bolmas. Sodan bolar mundai basylymdar aýdan ákiminiń árbir is-sharasyn kópirtip jazyp, onsyz da alaqandai gazet betin tiimdi paidalana almai jatatyny bar. Endi jeke kásipkerler gazet ómirine qandai serpin ákeldi?

– Gazet menshiginiń jartysyna jýyǵy jekemen­shiktiń úlesine tigeli beri jumysymyzdy taǵy bir pysyqtap, jandandyrǵanymyz ras, – deidi Talas aýdandyq «Talas tynysy» gazetiniń bas redaktory Dúisen Moldaqulov. – Biraq eshqandai shtat qysqarý máselesi oryn alǵan joq. Taǵy bir jaǵymdy jańalyǵymyz – gazetimiz oblys ortalyǵynda basylyp, túrli-tústi bolyp shyǵa bastady. Odan bólek jeke kásipkerdiń arqasynda jańa kompiýterler alyp, jumysymyzdy jeńildettik. Sondai-aq gazetimizde mazmun jaǵynan da kóptegen ózgerister bolyp jatyr. Kadr jaǵynan eshqandai másele joq. Tilshilerimizdiń bári óz isin biletin alǵyr mamandar.

Aýdandyq gazetter jekemenshikke satylǵaly beri jaǵdai­lary tipten jaqsy bolyp ketti deýge bolmas. Qujat júzinde «satyldy» degeni bolmasa, aýdandyq ákim­dikten burynǵysha memlekettik tapsyrys bo­iynsha qarjylaryn alyp, jumystaryn burynǵysha jalǵas­tyryp kele jatqan basylymdar da bar. Bul jerde istiń tetigi sol gazet basshylyǵynda otyrǵan azamat­tardyń qolynda siiaqty. Jergilikti bilikpen de, jeke kásipkermen de tyǵyz qarym-qatynas jasap, eki jaq­tyń da tilin taba bilse, gazettiń jumysy jandana­tyny anyq. Ákimdikti qaidam, kásipkerler paida joq jerge attap aiaq baspaityny beseneden belgili. Sondyqtan aýdandyq gazetterge jekemenshiktiń aralasýy bul basylymdardyń mazmunynyń ózgerýine, sapasynyń jaqsarýyna tikelei áser etýi tiis. Zamanǵa sai beiimdelip, jańasha gazet shyǵarý qajet. Áitpese tek aýdandyq ákimdik bólgen qarjyny burynǵysha jumsap, óz bidaiyn ózine qýyryp berý eshkimge abyroi ápermeitini anyq.

Qalai aitsaq ta óńirdegi aýdandyq gazetterdiń ahýaly nashar deýge kelmeidi. Qońyrqai, birqalypty ortasha tirligimen-aq aýyl halqyn aqparatpen qamtamasyz etip otyr. Endi zaman ózgerdi, qurylymy ózgerdi, soǵan sai gazet beti de ózgere alsa, qaneki!

Oralhan DÁÝIT, «Egemen Qazaqstan»

Jambyl oblysy

«Hantáńiri» jabylý aldynda tur

Aýylda turmaǵanymyzben, aýdan ómirin baspasóz arqyly únemi bilip otyramyz. Jaqsy isterine qýanyp, keibir kemshilikterine «áttegen-ai» dep qalatynymyz taǵy bar. Jaqynda elge barǵan edim. Jasymyzdan súiip oqityn aýdandyq «Hantáńiri» gazetiniń aýyr jaǵdaiyn kórip, qatty qinaldym.

Tarihy sonaý 1936 jyldan bastalatyn Raiymbek aýdandyq «Hantáńiri» (burynǵy «Sovettik shekara») gazetinde kezinde Berdibek Soqpaqbaev, Muqaǵali Maqataev, Baqqoja Muqai, Álnur Meiirbekov, Erkin Ibitanov, Dáýlet Jeldikbaev, Aitaqyn Ábdiqalov, Batyq Májituly, Minýar Ákimhanov, Rysbek Sársenbaev siiaqty elge tanymal jazýshylar men jýrnalister jumys istegen. Sol gazet «Jetisý-aqparat» mediaholding mekemesi taratylǵan soń, byltyrdan beri 50 paiyzy aýdan ákiminiń, al qalǵan 50 paiyzy redaktsiianyń qaramaǵyna berilipti.

Biylǵy jyly memleket tarapynan baspasózge qoldaý kórsetip, «Hantáńiri» gazetine 16 million teń­ge qarastyrylypty. Zaman talabyna sai aýdandyq ákim­shiliktiń ishki saiasat bólimi tender ótkizgen. Alaida belgisiz sebeptermen aqpan aiynda ótkizilýge tiisti tender tórt ai keshiktirilip, 23 maýsymda ótken. Tenderden 4,5 million teńge kóleminde utyp alǵan qarajat redaktsiiaǵa osy kúnge deiin túrli syltaýlarmen berilmegen. Qarajattyń jetpeý saldarynan túrli kommýnaldyq shyǵyndardy tóleý múmkin bolmaǵan. Amaldyń joqtyǵynan bes jýrnalist kezeksiz, eńbekaqysyz demalysqa jiberilgen. Almaty qalasyndaǵy «Almaty Bolashaq» baspahanasyna 917 myń teńge qaryz kórinedi. Jyl basynan bastap olar basylymnan túsken qarajatpen ǵana qyzmetkerlerge eńbekaqy tólep kelgen. Eńbekaqy demekshi, olardyń jalaqysynyń aldy 150 myńnan assa, tómengi jalaqylary 39 myńnan az ǵana kóp eken. Sonyń ózin ýaqtysynda bermei otyrǵan sheneýnikterge qalai renjimeisiń.

Gazetke aýdan basshylarynyń jete mán bermeýleri saldarynan ol óz jumysyn toqtatýdyń aldynda tur. Seksen jyldyq tarihy bar osy basylym buryn-sońdy osyndai qiyn jaǵdaida qalyp kórgen emes. Ol – aýdannyń betke ustar ainasy. Aýdannyń barlyq jaqsy jumystaryn asyryp, jamandarynyń kemshilikterin aityp, sol olqylyqtardy der kezinde túzetýge yqpal jasap otyratyn basylymǵa kóńil bólmeý – aýdan ákimdigine, onyń tiisti bólimine úlken syn.

Keiingi jyldarda aýdannan basqa jaqqa qonys aýdarýshylar azaimai otyr. Olardyń kóshý sebepterin anyqtap, taldaý jasaý, tizimderin alyp, esep júrgizý, kóshýdi boldyrmaýdyń joldaryn qarastyryp, jumys oryndaryn ashý siiaqty taǵy basqa ózekti máselelerdi gazet betterinde jariialap otyrsa, bul úderistiń azaiýyna septigi tigen bolar edi. Aýdan basshylary osyndai ózekti máselege jete kóńil bólýleri qajet siiaqty. Jýrnalisterdiń jaǵdailary oidaǵydai bolmasa, olar qarajat jaǵynan qysylyp jatsa, olardan jumys talap etý orynsyz bolatynyn túsine bilgenimiz durys.

Iá, búgingi aýdandyq gazettiń ahýaly osyndai. Oǵan aýdannyń atqaminerleri ne deidi? El-jurt buǵan qalai qaraidy?

 Berkin ÁKEBAEV, respýblikalyq «Altyn qalam» ádebi baiqaýynyń júldegeri

 Almaty oblysy, Raiymbek aýdany

BET QATTALYP JATQANDA:

Almaty oblysy Narynqol aýdandyq «Han­táńiri» gazetiniń taǵdyr-talaiyna qatysty ob­lystyq ishki saiasat basqarmasynan tómendegishe hat kelip tústi:

«Almaty oblysy ishki saiasat basqarmasy res­pýb­likalyq «Altyn qalam» ádebi baiqaýynyń júldegeri Berkin Ákebaevtyń hatyna sáikes, 2016 jyly memlekettik aqparattyq tapsyrys­ty júzege asyrýǵa memlekettik biýdjetten Raiymbek aýdanyna 16 mln 538 myń teńge bóli­nip, bul qarajat Raiymbek aýdandyq ishki saiasat bólimine tolyqtai aýdarylǵandyǵyn habarlaidy.

Satyp alý jeńimpazyn anyqtaý jergilikti atqarýshy organdardyń quzyretine kiredi».

Hatqa oblystyq ishki saiasat basqarmasynyń basshysy R.Alpysbaev qol qoiǵan.

Sonda aýdandyq ishki saiasatqa áldeqashan aýdarylǵan qarjy «Hantáńiri» gazetine ne úshin berilmei otyr? Qalai bolǵanda da aýdandyq gazet­tiń tenderde utyp alǵan 4,5 million teńgesi áli kúnge sheiin redaktsiianyń esep-shotyna aýda­rylmaǵandyǵy kúdik týdyrady. Bul biyl el Táýelsizdiginiń 25 jyldyq mereitoiynda Elba­sy­nyń memlekettilikti nyǵaitýdaǵy syndarly saiasatyn gazet oqyrmandaryna jetkizýge jasalyp otyrǵan kedergi emes pe? Oǵan qosa aýdan kóle­mindegi jańalyqtardy, ótkizilip jatqan sharalardy aýdandyq gazet jazbaǵanda qai gazet jazady? Azattyq alǵanymyzdyń shirek ǵasyrlyq mereitoiyn toilatyp jatqanda, «Hantáńiri» syndy tarihy tereńde jatqan gazettiń jabylýy Raiymbek aýdany ákimdigine úlken syn bolatyny anyq.