Atyraý oblysynyń qylmystyq ister jónindegi mamandandyrylǵan aýdanaralyq sotynda bir otbasynyń tórt múshesin óltirý týraly rezonansty is qaralyp jatyr. Sot protsesi shok týdyratyn dáleldemelerdi, iaǵni tergeý áreketteri túsirilgen beinejazbalardy zertteý kezeńine ótti. Alaida protsess jospardaǵydai bolmady: kadrlardaǵy máiitterdiń jaǵdaiyna bailanysty sýdia qatań shekteý engizýge májbúr boldy, al sot zalynda kútpegen jerden tehnika isten shyǵa bastady dep habarlaidy ult.kz dalanews.kz saityna siltep.
Otyrystyń negizgi bóligi marqumdardyń denesin qazyp alý sáti túsirilgen beinejazbalardy kórý bolýy kerek edi. Alaida sýdia zalda otyrǵandar men jýrnalisterge bárin tolyq kórsetýge ruqsat bermedi. Kameraǵa tek protsedýranyń bastapqy bóligin ǵana túsirýge múmkindik berildi. Buǵan máiitterdiń uzaq ýaqyt jer astynda jatyp, qatty ózgeriske ushyraýy sebep bolǵan.
"Máiitterdi shyǵaryp alý sáti beinelengen videokadrlardy jazýǵa jáne olardy áleýmettik jelide taratýǵa tyiym salynady. Ózderińiz túsinesizder, deneler uzaq ýaqyt kómýli jatqandyqtan qatty ózgergen. Mundai kadrlardy psihikasy álsiz adamdar men kámeletke tolmaǵandar kórip qoiýy múmkin. Bul olarǵa ziian keltirýi yqtimal", – dedi isti qarap jatqan sýdia Zarema Hamidýllina.
Sot zalyndaǵy tilshiniń habarlaýynsha, tsenzýrasyz kadrlar óte aýyr bolǵan. Marqumdardyń deneleri qatty buzylǵan kúide kórsetilgen. Alaida basty kúdikti, marqumdardyń kúieý balasy Sultan Sársemálievtiń reaktsiiasy da kýágerlerdi tańǵaldyrǵan. Óz áieliniń týystaryn qora men úi aýlasyna kómdi dep aiyptalyp otyrǵan er adam ekranǵa esh emotsiiasyz, bet-júzi ózgermesten qarap otyrǵan.
Lombardtar, zeinetaqy jáne shetelge qashý
Eksgýmatsiia videolarynan bólek, sotqa birqatar zattai dáleldeme usynyldy. Materialdar qatarynda mynalar bar:
Maqsot Qarabalin, Násip Ýteshqalieva jáne olardyń balalary – 32 jastaǵy Naýryz ben 35 jastaǵy Meiramgúldiń denesin qaraý kezinde túsirilgen jazbalar;
Munaishy-3 yqshamaýdanynda júrgizilgen tergeý eksperimentiniń videosy. Onda Sársemáliev týystaryn qalai óltirgenin egjei-tegjeili kórsetip, aityp bergen;
Aiyptalýshynyń jańa ǵana óltirilgen enesi Násiptiń altyn áshekeilerin lombardqa ótkizgen sáti túsirilgen kadrlar;
“Qazposhta” ǵimaratyndaǵy beinejazbalar. Onda aiyptalýshy týystary “habar-osharsyz ketti” dep sanalyp júrgen kezde olardyń zeinetaqysyn sabyrly túrde sheship alǵany kórinedi;
Shymkent vokzaly men “Qaplanbek” shekara beketiniń kameralaryndaǵy jazbalar. Bul materialdar onyń elden qashý baǵytyn kórsetedi. Sondai-aq is materialdarynda Sársemáliev pen onyń áieli Aqbaian Muqanǵalievadan alynǵan jaýaptar bar.
Tehnikalyq aqaý ma, álde tylsym jaǵdai ma?
Eń aýyr videomaterialdardy kórsetý kútpegen sebeppen toqtap qalǵan. Eksgýmatsiia kadrlary kórsetilip jatqan kezde sot zalyndaǵy tehnika jappai isten shyǵa bastaǵan: diskiler oqylmai qalǵan, al buǵan deiin esh qiyndyqsyz ashylǵan faildar kenetten “bos” bolyp shyqqan.
Tilshi bul jaǵdaidy “tylsym qubylysqa” teńegen. Onyń aitýynsha, sýdianyń ózi de bolǵan jaitqa tańǵalǵan, sebebi buǵan deiin barlyq tehnika qalypty jumys istep turǵan.
Tehnikalyq aqaýlarǵa bailanysty negizgi dáleldemelerdi qaraý kúnniń ekinshi jartysyna shegerildi.
