Atyraýda qabaǵan it talaǵan eki jasar bala aýrýhanada em alyp jatyr. Dárigerler balanyń jaǵdaiy ortasha deńgeide ekenin aitty, dep habarlaidy "Ult aqparat".
Oblystyq politsiia departamenti baspasóz qyzmetiniń málimetine súiensek, 18 qarashada saǵat 16:51-de «102» pýltine «Juldyz-2» shaǵyn aýdanynyń turǵyny kishkentai balany it talap ketkenin habarlaǵan.
«Oqiǵa ornyna dereý jetken politsiia qyzmetkerleri eki jasar balanyń basy men qoly jaralanǵanyn anyqtady. Kishkentai búldirshin oblystyq balalar aýrýhanasyna jetkizildi. Balany tistegen itke izdeý salynyp, sol shaǵyn aýdandaǵy óndiristik bazalardyń biriniń aýmaǵynan ustaldy. Ittiń iesi Atyraý qalasynyń 35 jastaǵy turǵyny bolyp shyqty. Oǵan qatysty QR Ákimshilik quqyqbuzýshylyq týraly Kodekstiń 408-babynyń 2-bóligi (Aýyl sharýashylyǵy janýarlaryn jaiý erejelerin, itter men mysyqtardy asyraý jáne serýendetý erejelerin, qańǵybas itter men mysyqtardy aýlaý jáne joiý erejelerin buzý) ákimshilik hattama toltyryldy», - dep habarlady departamenttiń baspasóz qyzmeti.
Oblystyq balalar aýrýhanasynyń dáriger-travmatology Jaqsylyq Maǵzomovtyń aitýynsha, jaraqat alǵan bala em alyp jatyr. Qasynda anasy bar.
«Sársenbi kúni aýrýhanaǵa jetkizilgen balaǵa alǵashqy meditsinalyq kómek kórsetildi. It tistegennen qalǵan jaraǵa hirýrgiialyq óńdeý jasaldy. Bala basy men qolynan ortasha deńgeide jaraqat alǵan. Qazir bala travmatologiia bóliminde jan-jaqty em alyp jatyr», - dedi dáriger-travmatolog Jaqsylyq Maǵzomov.
