Atyraý qalasyndaǵy «Gaýhartas» turǵyn úi kesheninen eki kúnde úsh ret órt shyqty, dep habarlaidy QazAqparat.
Oblystyq tótenshe jaǵdailar departamentiniń qoǵammen bailanys tobynan málim etkendei, Atyraý qalasyndaǵy «Saryqamys» shaǵyn aýdanynda ornalasqan «Gaýhartas» turǵyn úi kesheninde eki kúnde úsh ret órt shyqqan.
Keshe, 10 shildede saǵat 23:00 shamasynda «Gaýhartas» turǵyn úi keshenindegi páterdiń birinde elektr jelisiniń qysqasha tuiyqtalýynan kir jýatyn mashinka órtengen. Jalyndy turǵyndardyń ózderi sóndirip alǵan.
Al, búgin, 11 shildede saǵat 9:54-te atalǵan turǵyn úi keshenindegi №3 úidiń páterinen tútin shyǵyp jatqany jóninde habar túsken. Tótenshe jaǵdailar departamentiniń qutqarýshylary anyqtaǵandai, órttiń tutanýyna taǵy da elektr jelisiniń qysqasha tuiyqtalýy sebep bolǵan. Órttiń saldarynan turmystyq zattar janyp ketken.
Búgin, túsqaita saǵat 14:52-de «Gaýhartas» turǵyn kesheninde taǵy bir órt tirkeldi. Jalyn osyndaǵy №3 úidegi páterdiń 1 200 sharshy metrlik ekinshi qabaty men shatyryn sharpyǵan.
«Departamenttiń órt sóndirýshiler jalyndy saǵat 16:25-te oqshaýlady. Órt saǵat 16:51-de tolyq sóndirildi. Turǵyn úi keshenindegi órt sóndirýge tótenshe jaǵdailar departamentiniń 40 qyzmetkeri men 10 arnaiy tehnikasy, politsiia departamentinen 20 qyzmetker men 9 tehnika, «AMÓZ», «Semser-Órt sóndirýshi», «Aqberen» JShS-nen 8 qyzmetker men 3 tehnika, sondai-aq, Soltústik Kaspii ekologiialyq áreket etý bazasynan 4 qyzmetker men 1 tehnika tartyldy», -dep málim etti depratamenttiń qoǵammen bailanys tobynan.
Eki kún qatarynan tutanǵan úsh órtten zardap shekkender joq. Qazir órttiń ózge de sebebi anyqtalyp jatyr.
