Atyraý qalasynda eki aida salynǵan modýldi tiptegi infektsiialyq aýrýhana paidalanýǵa berildi, dep habarlaidy "Ult aqparat".
Jańa aýrýhana NCOC kompaniiasynyń demeýshiligimen boi kótergen. Onda 8 blok pen 10 qosalqy nysan bar. Aýrýhana ǵimaraty Germaniianyń «Modex» zaýytynda shyǵarylǵan modýldik temirbeton bloktardan qurastyrylǵan. Ǵimarattyń jalpy aýmaǵy – 8924 sharshy metr.
Aýrýhanada diagnostika men emdeý úshin zamanaý kompiýterlik tomografpen, sandyq rentgen apparatymen, meditsinalyq gazdar júiesimen, ÝDZ, EKG, ókpeni jasandy jeldetý apparattary jáne basqalarmen qamtylǵan. Meditsinalyq mekemede qaýipsizdik deńgeii joǵary aqyldy jeldetý júiesi ornatylǵan. Palatalarda ár tósekte medbikeni shaqyrý túimesi bar. Oqshaýlanǵan bokstarǵa arnaiy chipter arqyly ǵana kirýge bolady. Munda jergilikti meditsina qyzmetkerlerimen qatar Grýziia respýblikasynan kelgen dárigerler alty ai boiyna jumys jasaityn bolady.
«Eń bastysy, jańa meditsinalyq mekeme óńirdegi meditsinalyq kómektiń qoljetimdiligi men sapasyn arttyrýǵa múmkindik beredi», - dedi óńir basshysy Mahambet Dosmuhambetov.
Meditsinalyq nysanda 56 eki oryndyq, 16 úsh oryndyq, 6 bir oryndyq palata men jeti eki oryndy boks aýlaǵa shyǵatyn arnaiy esikterimen jasalǵan.
Oblystyq densaýlyq saqtaý basqarmasynyń basshysy Ashan Baidýálievtiń aitýynsha, joǵary tehnologiialyq meditsinalyq jabdyqtardy qospaǵanda, jobany iske asyrý kezinde otandyq materialdar men taýarlardy paidalanýǵa basymdyq berilgen. Infektsiialyq aýrýhana 200 tósekke eseptelgen. Onyń ishinde 20 oryn jansaqtaý jáne qarqyndy terapiia bólimshesine arnalǵan.
«Patsientterdi emdeý men diagnostikalaýǵa qajetti qural-jabdyqtarmen qamtyldy. PTR zerthanasy, rentgen men kompiýterlik tomografiia kabinetteri ashyldy. Aýrýhana dálizine qaýipti infektsiianyń taralmaýy úshin palatalardyń ishinde teris qysym jasaityn arnaiy sorý-syrtqa taratý jeldetkishimen jabdyqtaldy. Munda «las» jáne «taza» aimaqtarǵa bólindi. Aýany tereń tazartatyn ORIT súzgi qoraptary ornatyldy.
Aýrýhana aýmaǵynda jedel járdem kólikteri dezinfektsiialaý pýnktine óńdeýden ótkiziledi. Sondai-aq, meditsinalyq qaldyqtardy zararsyzdandyrý stantsiiasy iske qosyldy. Reanimatsiia men qarqyndy terapiia bólimsheleri membrana arqyly ótken taza sý óndirý jáne búirek jetkiliksizdigi bar patsientterge arnalǵan dializ apparattarymen jabdyqtaldy. Palatadaǵy árbir tósek meditsinalyq gazdar men ottegi jelisine qosyldy», – deidi basqarma basshysy Ashan Baidýáliev.
Aýrýhanada emdelýshilerdiń densaýlyq jaǵdaiyna qashyqtyqtan monitoring júrgiziletin avtomattandyrylǵan monitoring ortalyǵy jasaqtalǵan. Meditsina qyzmetkerleri emdelýshilerdiń aýrý tarihyn, saraptamalardy planshetter arqyly almasady.
Modýldi infektsiialyq aýrýhananyń jobasyn «Aqmol Project» JShS daiyndaǵan. Al qurylysyn «BI-Industrial» JShS eki aiǵa jeter-jetpes mezgilde, iaǵni, 18 tamyz-15 qazan aralyǵynda júrgizgen.
