Atyraý oblysynda suiytylǵan munai gazyn bólý tártibine qatysty daý týyndap, oblystyq energetika jáne turǵyn úi-kommýnaldyq sharýashylyq basqarmasyna qatysty tergep-tekserý bastaldy, dep habarlaidy ult.kz.
Qazaqstan Respýblikasy Básekelestikti qorǵaý jáne damytý agenttiginiń málimetinshe, tekserý suiytylǵan munai gazyn bólý jáne jetkizý josparlaryn qalyptastyrý kezinde jergilikti atqarýshy organdardyń áreketterin taldaý nátijesinde qolǵa alynǵan.
Vedomstvo buǵan deiin basqarmaǵa básekelestikti qorǵaý salasyndaǵy zańnamany buzý belgileri bar ekeni jóninde habarlama joldaǵan. Alaida belgilengen merzim ishinde atalǵan talaptardy oryndaý boiynsha tiisti sharalar qabyldanbaǵan. Osyǵan bailanysty zańnamaǵa sáikes tergep-tekserý rásimi bastaldy.
Qazirgi ýaqytta mamandar quqyq buzýshylyq belgileriniń bar-joǵyn anyqtaý úshin materialdardy jinap, taldaý júrgizip jatyr. Atap aitqanda:
– naryqtyń jekelegen qatysýshylaryna artyqshylyqtar men jeńildikter berý;
– keibir sýbektiler úshin basym jaǵdai jasaý;
– básekelesterge qatysty kemsitýshilik jaǵdailar qalyptastyrý faktileri tekserilýde.
«Tergep-tekserý Qazaqstan Respýblikasy Kásipkerlik kodeksiniń 194-baby 2-tarmaǵynyń 9-tarmaqshasyna sáikes júrgizilýde. Qorytyndysyna qarai qoldanystaǵy zańnama aiasynda tiisti sharalar qabyldanady», – dep habarlady agenttik.
