Atyraý oblysynda júk poiyzy men jeńil kólik soqtyǵysty. Oqiǵa ornynda bir adam mert boldy, dep habarlaidy QazAqparat.
Oblystyq tótenshe jaǵdailar departamenti qoǵammen bailanys tobynyń málimetinshe, qaiǵyly oqiǵa búgin, 13 shildede bolǵan.
Bul týraly Atyraý oblysynyń Maqat aýdanyndaǵy №8 órt sóndirý bóliminiń bailanys beketine jergilikti ýaqytpen saǵat 11:45-te habar túsken.
Maqat kentinen 20 shaqyrym qashyqtyqta temir jol ótkelinen ótpek bolǵan «Lada Granta» jeńil avtokóligi júk poiyzynyń teplovozyna soqtyǵysyp qalǵan.
«Soqtyǵysýdyń saldarynan jeńil kóliktiń 1999 jylǵy júrgizýshisiniń jaraqat alǵany anyqtaldy. Al kólikte bolǵan 54 jastaǵy jolaýshy oqiǵa ornynda kóz jumdy», - dep habarlady departamenttiń qoǵammen bailanys tobynan.
Tótenshe jaǵdailar departamentiniń qyzmetkerleri «Holmatro» arnaiy quraly arqyly mert bolǵan adamnyń denesin shyǵarý jumystaryn júrgizdi.
Júk poiyzynyń tirkemesinde qurylys materialdary tielgen 66 júk vagony bolǵan.
