Atyraý oblysy Isatai aýdanynda Kaspii teńiziniń jaǵalaýynda 500 oryndyq oqý-saýyqtyrý lageri salynady. Bul týraly búgin Atyraý oblysynyń ákimi Nurlan Noǵaevtyń halyqqa esep berý jiynynda aityldy.
Mundai deńgeidegi nysan oblysta alǵash ret salynǵaly otyr. Joba nobaiyna qarap-aq onyń kólemin baǵalaýǵa bolady. Lager aýmaǵy birneshe aimaqqa bólinedi. Ákimshilik aimaqta qyzmetkerler jataqhanasy, ákimshilik ǵimarat, meditsinalyq bólimshe ornalasady.
Aýmaqta balalar ortalyǵy, kinozal, jattyǵý zaly, kitaphana men balalar shyǵarmashylyǵyna arnalǵan birneshe úiirmeler bolady Munda balalar jas natýralister stansasynda jattyǵa alady.
Sport aimaǵynda fýtbol, basketbol, voleibol alańdary, tennis korty, ústel tennisi alańy, skalodrom alańy, ár túrli kóshe jattyǵý qurylǵylary, badminton, vorkaýt alańdary bolady. Jaǵajai qubylmaly tereńdiktegi ashyq basseinmen, saiabaq, rolledrom, skeitdrommen jabdyqtalady. Velosipedpen serýendep, tańerteń júgirgisi keletinder úshin júgiretin jol men eki jolaqty velosiped joly qarastyrylǵan.
Lagerdi kógaldandyrý jumystary tuzdy topyraq jaǵdaiynda ósirýge jaramdy aǵash-butaly kóshetter men arnaiy aǵash kespekter otyrǵyzý ádisimen júrgiziledi. Osy lager qurylysy Atyraý oblysy halqyna Kaspii teńiziniń jaǵalaýyna órkenietti túrde shyǵýǵa jol ashady. Lager qurylysy jer qoinaýyn paidalanýshylardyń áleýmettik aýdarymdary esebinen júrgiziledi. Qurylys 2018 jyly bastalady dep josparlanyp otyr.
– Lager qurylysy, atalǵan jerde injenerlik-kommýnikatsiialyq infraqurylym júrgizý shaǵyn jáne orta biznes sýbektilerine shaǵyn qonaqúiler, demalys bazasy, tamaqtaný orny sekildi jańa demalys oryndaryn ashýǵa, al turǵyndarǵa, qonaqtar men týristerge Kaspii teńiziniń jaǵalaýynda tolyqqandy demalýǵa múmkindik beredi, – dedi Nurlan Noǵaev.
Aita ketý kerek, osyndai nysandar salý mýltiplikativtik nátije beredi – jańa jumys oryndaryn qurý, ShOB sýbektilerin kóbeitý, syrtqy jáne ishki týrizmdi damytý – bul jumystar elbasy tapsyrmasynyń aiasynda jasalýda. Sonymen qatar, qazirgi ýaqytta Besikti aýylynda 300 oryndyq balalarǵa arnalǵan emdeý-saýyqtyrý lageriniń JSQ –sy jasaqtalýda.
