Atyraý oblysynyń Súiindik aýylynda bir aidan beri belgisiz aýrýdan eki myńnan astam qoi qyrylyp qaldy. Sharýashylyqta Edilbai qoiy ósiriledi.
Atyraý oblysy Qurmanǵazy aýdanynyń Súiindik aýylynda sáýir aiynan beri qoi jappai qyryla bastady, dep habarlaidy 24.kz.
Shyǵyn mólsheri 60 million teńgeden asqan. Júz adam jumys isteitin asyltuqymdy sharýashylyq jetekshileri bul sharýashylyqtyń bir jyldyq tabysy ekenin aitady.
Sáýir aiynda bastalǵan indetten kúni búginge deiin 2100 bas Edilbai qoiy aram ólgen. Barlyq otardaǵy malǵa ekpe jasalǵanymen, ólim-jitim áli de tolastamai tur. «Al jergilikti atqarýshy bilik ókilderinen qaiyr joq», – deidi sharýalar.
Mamandar qoi sheshek aýrýynyń kesirinen qyrylyp jatyr degen diagnoz qoiǵan. Tez arada 36 myń vaktsina alynyp, ekpe jasalynǵan eken.
"Bastapqy kezde naqty diagnozy tabylmaǵanymen, maldy aman alyp qalý úshin otarǵa túgeldei ekpe jasaldy. Barlyq sharany qoldansaq ta, shyǵyn áli de toqtamai tur", - dedi mal dárigeri Haliyq Seiitjanov.
Synamalar Atyraý men astanadaǵy zerthanaǵa jiberildi. Aýyl sharýashylyǵy ministrliginiń jaýaby kóp kúttirgen joq. Alaida másele munymen sheshilmedi. Sheshek aýrýy diagnozy rastalmaǵan. Biraq maldyń qyrylýynyń naqty sebebi anyqtalmapty.
"Bizdiń maldyń diagnozy áli kúnge deiin anyqtalmai otyr. Quzyrly organdar osyny habarlap, múmkindiginshe bizge dotatsiia, bolmasa ótemaqy tólep kómek etse degen oiym bar", - dedi sharýa qojalyǵynyń basshysy Baýyrjan Isaqulov.
Ózge sharýa qojalyqtarynda da qoidyń qyrylyp jatqany belgili boldy. Jergilikti turǵyndardyń qoralaryndaǵy mal da belgisiz indetke shaldyqqan.
Edilbai qoiy
Bul - qazaqy qoi tuqymynyń bir túri. 19 ǵasyrdyń aiaǵynda Edil-Jaiyq boiynan taraǵan. Qurǵaq jáne shóleit aimaqtarda ósýge beiimdelgen. Túsi bozǵylt, qyzyl qońyr, kóbinese qara bolady. Dene bitimi myǵym, basy úlken, turqy uzyn, jotaly, keýdesi keń. Qoshqarynyń salmaǵy 100 – 120 keli, saýlyǵy 65 – 75 keli. Edilbai qoiy tez ósedi. Bul tuqym quiryqty qazaqy qoi tuqymdaryn jaqsartý úshin paidalanylady. Kóbinese Batys Qazaqstan, Qaraǵandy oblystarynda ósiriledi.
