Atyraý oblysynda ózgelerden dene bitimi erekshe, alyp tulǵaly Parasat NURǴALIEV esimdi jigit turady. Búginde Parasattyń boiy 2 metr 15 santimetr, al salmaǵy 150 kilogramm bolsa, aiaq kiim ólshemi 56-ǵa jetken.
Inder aýdany Jarsýat okrýgine qarasty Qurylys aýylynyń erekshe turǵyny týraly jergilikti "AqJaiyq" portaly jazdy.
«QAShAN DURYS AIaQ KIIM KIGENIMDI UMYTYP QALDYM»
Aitsa aitqandai, erekshe dene bitimine orai kiim taýyp kiiý Parasatty jii oilandyratyn. Kez-kelgen saýda ornynan oǵan shaq kiim tabý múmkin emes, oǵan arnaiy tiginshi kerek edi. Tiginshi týysy alyp jigitke kiimdi ózi tigip berip otyrǵan. Al aiaq kiimdi tabýǵa qinalatyn. Alyptyń aiaǵyna baratyny rezińke slantsy ǵana. Kún sýyp, qys túskende, qar erigen kezderde dalaǵa attap shyǵa almaǵan kezderi bolypty. Sondyqtan Baiǵali Ótemanov bastaǵan aýyldastary oǵan kómektesýge bel býyp, aiaǵynyń ólshemine sai aiaq kiimge tapsyrys bergen.
- Qazaqtyń alyby Qajymuqan atamyzdyń aiaq kiimi 54-shi ólshem bolypty. Al Parasattyń aiaǵy odan da úlken. Oǵan shaq keler aiaq kiimdi tiktirý úshin birtalai jerge habarlastym, biraz tiginshimen sóilestim. Aiaǵynyń úlkendigin bilgesin bári qarsylyq bildire bastady. Tipti Astanaǵa shaqyrǵan aiaq kiim tiginshileri boldy, onda Parasatty aparý úshin aiaǵyna aiaq kiim kerek qoi. Sóitip qinalyp júrgenimde Almatydan tiginshi Valerii VORONIN ǵana kelisim berdi. Sheberdiń aitýynsha, ol 40 jyl etik tigýmen ainalysqanda 49-shy ólshemnen artyq aiaq kiim tikpegen. Kezinde Nursultan Nazarbaevqa, Roza Baǵlanovaǵa arnaiy aiaq kiim tikken sheber eken. Bir jaǵynan qyzyǵýshylyq tanytqan ol 56-shy razmerli qalyby joqtyǵyna qaramastan tigip shyǵýǵa ýáde berdi, onysyn oryndady da. 52-shi razmerli qalypty úlkeitip, 20 kúnniń ainalasynda 200 myń (jalpy 350 myń teńgege tigedi eken) teńgege osy aiaq kiimdi tigip berdi. Keshe ǵana keldi, bul kúzdik aiaq kiim, al kiip kór, Parasat, - dedi aýyldasy Baiǵali Ótemanov kúlimdep.
Jaqsy bylǵarydan tigilgen, qyzǵylt qońyr tústi aiaq kiimdi kórgen Parasat balasha qýanyp:
- Mundai aiaq kiimdi qashan kigenimdi umytyp qalyppyn, - dedi.
Ári-beri júrip kórdi, aiaǵyna quiyp qoiǵandai jarasa ketti. Kiip kelgen slantsyiyn oilanbastan qoqysqa tastady.
- Qalai eken, Parasat?
- Vo! - deidi ol bas barmaǵyn kórsetip.
Ótemanovtyń aitýynsha, aýyl jigitteri qysqy aiaq kiimge de tapsyrys berip qoiǵan.
ALYP ANADAN TÝADY
Osy aidyń aiaǵynda 27 jasqa tolatyn Parasat otbasyndaǵy eń kenjesi eken. Bes aǵaiyndy jigittiń úsheýi úilenip óz aldyna otaý tikse, ápkesi de turmysqa shyqqan. Parasat 2014 jyly Qurylys orta mektebin bitirip, Atyraýdan temir pisirýshi mamandyǵyn alyp shyqqan.
- Ákem Serikqali qaitys bolǵan, anam Qońyrsha ekeýmiz birge turamyz. Anam aitatyn, sen erekshe salmaqta týylmaǵansyń, kóppen birdei boldyń dep.
- Jalpy irilik atatekte bolǵan ba?
- Meniń ájem Áýez asa etjeńdi bolmaǵanymen, súiekti, iri bolǵan. Ákem de osal bolǵan joq, jaýyryndy, deneli edi, qolynyń ózi dáý bolatyn. Meni kórgender ákeńe tartqansyń deidi. Al aǵalarym mendei emes, boilary ortasha.
- Dene bitimińdegi ózgeristi qashan sezindiń?
- Men basqa balalar siiaqty bolǵanymmen, 6-synypta oqyp júrgende denemdegi erekshelikti baiqai bastadym. Birtúrli súiekterim óse bastaǵandai ma, aiaqtarym uiyp, birtúrli sezimde boldym. Kiimder kishkentai bola bastady, boiym tez ósip, aiaǵym úlkeiip ketti. 9-10-shy synyp oqyp júrgenimde aiaq kiim tabý problema bola bastady, 50-shi razmerge jetti. Al ondai aiaqkiim tabý óte qiynǵa soqty. Mektepti bitirerde salmaǵym 120 kg, al boiym 2 metrge jetti. Densaýlyǵymda esh kinarat bolǵan emes.
ALYPQA DA JUMYS KEREK
- Jalpy boiyńnyń uzyndyǵy kedergi keltirmei me?
- Joq, men úirenip kettim.
- Qazir ne jumys jasap júrsiń?
- Mende turaqty jumys joq, kóbine úilerdiń irgetasyna lai quiýda, sylaq sylaýda júrmin. Jumystan sharshamaimyn, qazir tórt adam bolyp irgetasyn quiýmen ainalysýdamyz. Aýyldyń «qara jumysymen» ainalysamyn. Óz mamandyǵymmen jumys jasaǵan emespin.
- Parasat, armanyń qandai?
- Ony da aitý kerek pe? Qupiia bolyp qalsynshy.
Sózge sarań bolǵanymen, qara kúshtiń iesi Parasat joldastarymen jaqsy aralasyp turady eken. Ony aýyl adamdary jaqsy kóredi. Alyp jigittiń iriligine tań qalyp, sýretterge túsirýmen boldym. Boiy 1 metr 70 sm Baiǵali onyń qasynda «balasyndai» bolyp qaldy. Qolymyzdy salystyryp kórdik, saýsaqtary óte iri. Meniń qolym onyń jartysyndai ǵana.
- Únemi qara jumys tabyla bere me, turaqty óz kásibi oǵan taptyrmaityny túsinikti. Ginnestiń rekordtar kitabyna suranyp turǵan Parasattyń ómiri ózgeshe bolý kerek, - deidi aýyldastary.
