2022 jyly paidalanýǵa beriletin «Atyraý-Astrahan» jolynyń qurylysy qarqyndy júrip jatyr. Bul týraly búgin Ortalyq kommýnikatsiialar qyzmetindegi baspasóz máslihatynda Atyraý oblysynyń ákimi Nurlan Noǵaev aitty, dep habarlaidy "Ult aqparat".
«Resei Federatsiiasy shekarasy - Atyraý» jolyn qalpyna keltirýge baǵyttalǵan jumystar josparǵa sai júzege asyp jatyr. Joldyń jalpy uzyndyǵy - 277 shaqyrym. Búgingi tańda trassanyń 60 shaqyrymyn jóndeý jumystary bastaldy. Jobalyq-smetalyq qujattamaǵa sai qurylys jumystary 2021 jyly aiaqtalýy tiis. Biraq, qurylys qarqyny jaqsy bolǵandyqtan qurylysshylar erte bitirýi de múmkin», - dedi aimaq basshysy.
Atyraý - Astrahan – «Nurly jol» baǵdarlamasy aiasynda júzege asyrylyp jatqan eki baǵyttaǵy joldyń biri. 2022 jyly tolyqtai paidalanýǵa beriledi dep josparlanyp otyr. Ekinshi baǵyt – Atyraý-Aqtóbe joly, onyń 27 shaqyrymy tóseldi, 88 shaqyrymy salynyp jatyr. Qalǵan 40 shaqyrymynda daiyndyq jumystary júrýde.
Sonymen qatar, aimaqta kólik infraqurylymyn damytý boiynsha jol-qurylys jumystary júzege asýda. Jalpy uzyndyǵy - 165 shaqyrym bolatyn 216 kóshe, 32 eldi mekende jol salý josparlanǵan. Oblys ortalyǵynda 4 basty kóshe keńeitiledi, keńeitý jobasy: jol tósemin kóbeitý, jańa LED jaryqtandyrý ornatý, jaiaý júrginshiler jolyn, velo-jol salý jumystaryn qamtidy. Keler jyly oblys ortalyǵynda 7 kósheni keńeitý josparlanǵan. 45 shaqyrym jańa jol salynady.
«Búginde Atyraýda jáne qala mańyndaǵy eldi mekenderdegi sapaly jol úlesi – 85 paiyz», - dep atap ótti Nurlan Noǵaev.
