Atyraý ákimdiginde turǵyn úige aqsha salǵan úleskerlermen kezdesý ótti. Jinalys kezinde "Jibek joly" turǵyn úi-qurylys kooperativiniń eki ókili qamaýǵa alyndy, dep habarlaidy Sputnik Qazaqstan "Aq Jaiyq" portalyna silteme jasap.
Ákimdikke 150-den astam adam keldi. Olardyń kóbisi "Jibek joly" turǵyn úi-qurylys kooperativine 10-25 million teńgeden salǵan. Biraq baspana áli berilgen joq. Al keibir páterlerdi birneshe ret satyp jibergen.
"Olarda birneshe turǵyn úi-qurylys kooperativi bar. Keńsesi áli istep tur. Qyzmetkerler klient tartyp, aktsiialar men jeńildikterdi jarnamalap otyr. Al jańa úidiń kiltin alatyn adamdar balalarymen birge jaldamaly páterdi, ia bolmasa, týystarynyń úiin panalap júr", - deidi úleskerler.
Atyraý oblystyq tergeý basqarmasynyń bastyǵy Nurmuhamed Mutalievtiń aitýynsha, "Jibek joly" turǵyn úi-qurylys kooperativiniń ústinen 70 aryz túsken.
"Biz shaǵymda kórsetilgen esepshottardy tekserip shyqtyq. Ol jerde aqsha joq. Politsiiaǵa shaǵym túsirmegen adamdar bolsa, basqarmaǵa nemese oblystyq departamentke kelińizder", - dep atap ótti Mutaliev.
Byltyr 27 jeltoqsanda "Jibek joly" TQK tóraǵasy E.Sardarbekov pen satý bóliminiń basshysy A.Iýsýpovaǵa qatysty Qylmystyq kodekstiń 190-baby, 3-bóliginiń 3-tarmaqshasy (Alaiaqtyq, eki nemese odan da kóp adamǵa qatysty jasalǵan áreket) boiynsha sotqa deiingi tergeý sharalary bastalǵan.
Al kooperativ tóraǵasy E.Sardarbekov bárine pandemiia kináli dep otyr.
"Bizdiń turǵyn úi-qurylys kooperativimiz 2020 jyly qurylǵan. Sodan beri tóraǵa qyzmetin atqaryp kelemin. Karantin boldy, qurylys materialdary jáne taǵy basqa zattar qymbattady. Bunyń barlyǵy qurylysqa da keri áserin tigizdi. Qazirgi kezde úleskerler aqshany qaitarýdy talap etip otyr. Men kún-tún demei, investor izdep jatyrmyn. Tabylǵan kúnniń ózinde olar bárin esepteidi, halyqtyń narazylyǵyn kóredi de, ketip qalady", - dedi Sardarbekov.
Al qalalyq sáýlet-qurylys baqylaý basqarmasynyń basshysy "Jibek joly" turǵyn úiiniń jobasy bekitilmegenin málimdedi. Jobalyq-smetalyq qujattary joq. Saraptama jasalmaǵan.
Jinalys kezinde "Jibek joly" TQK tóraǵasy E.Sardarbekov pen satý bóliminiń basshysy A.Iýsýpova qamaýǵa alyndy.
"Olardyń taǵdyryn tergeý soty sheshedi. Ýaqytsha qamaý abaqtysyna nemese úi qamaqqa jiberiledi, ony sot sheshedi", - dedi qalanyń bas politseii.
Kezdesýge Atyraý qalasynyń ákimi Meiirim Qalaýi de qatysty.
