Aty ańyzǵa ainalǵan telejúrgizýshi Larri King 87 jasynda ómirden ótti. Jyl basynda odan koronavirýs anyqtalyp, aýrýhanaǵa jatqyzylǵan edi. Onyń qaitys bolǵany týraly habar senbi kúni Tvitterdegi jeke paraqshasynda jariialandy, dep habarlaidy "Ult aqparat".
Loýrens Harvi Zeiger (Larri King) 1933 jyly Brýklinde evrei otbasynda dúniege kelgen. Onyń áke-sheshesi din ustanatyn jandar bolǵanymen, ózi eseie kele agnostik boldy.
Áigili telejúrgizýshi jýrnalistik salada 60 jyl qyzmet atqardy. Onyń teń jartysyna jýyq ýaqyt Si-en-en telearnasynda óziniń avtorlyq baǵdarlamasyn júrgizdi.
King álemge tanymal saiasatkerlermen, shoý-biznes juldyzdary, ataqty sportshylarmen suhbat qurdy.
Tikelei efirde shyǵatyn Larry King Live tok-shoýyn "dáýreni júrip turǵan shaǵynda" bir túnde 1,5 million kórermen tamashalaityn bolǵan.
Bul baǵdarlamanyń eń sońǵy bólimi 2010 jyly shyqty. Sol mezette Larry King Live tarihta júrgizýshisi eń uzaq ýaqyt aýyspaǵan telebaǵdarlama retinde rekord ornatyp, Ginnes kitabyna endi.
