Búgin Nur-Sultan qalasynda «Atamnyn Amanaty» qoǵamdyq birlestigin «Jyly júrek» búkilreseilik syilyǵymen marapattaý sharasy ótti, dep habarlaidy "Ult aqparat".
«Atamnyn Amanaty» uiymy Ekinshi dúniejúzilik soǵys kezinde qazaqstandyq sarbazdardyń jerlengen jerlerin anyqtap, muraǵattyq-izdestirý jumystarymen ainalysady. Biyl Uiym «Rýhani jańǵyrý» qazaqstandyq qoǵamdyq damý institýtynyń bastamasymen qolǵa alynǵan «Ózgerister sarýarlary» akseleratsiiasynyń jeńimpazy retinde úzdik 20 jobanyń tizimine engen. «Rýhani jańǵyrý» QQDI tóraǵasy Daniiar Esinniń aitýynsha, joba qazaqstandyqtardyń patriotizmi men Otanǵa degen súiispenshilik sezimine baǵyttalǵan.
- «Atamnyn Amanaty» uiymynyń ókilderi qoǵamdyq sanany jańǵyrtý boiynsha «Rýhani jańǵyrý» baǵdarlamasynyń naǵyz elshilerine ainaldy. Bul óz eliniń tarihi murasyna bei-jai qaramaityn jas qazaqstandyqtardan quralǵan uiym. Búginginiń batyrlary desek te bolady. Óitkeni, Ekinshi dúniejúzilik soǵys kezinde habar-osharsyz ketkenderdi izdep, olardyń máńgi este qalýy úshin muraǵattyq-izdestirý jumystaryn júrgizip jatqandyqtary úlken erlik. Maidanda soǵysqan 1,5 million qazaqstandyqtyń 270 myńy habar-osharsyz ketken. Arada talai jyl ótti. Sol kezdegi kýágerlerdiń kóbi búginde ómirde joq. Iaǵni, derekterdiń joiylǵanyna bailanysty iz-túzsiz joǵalǵandardy tabý óte qiyn. Soǵan qaramastan «Atamnyn Amanaty» uiymy tabandylyq tanytyp, talai sarbazdy tabýǵa eńbek sińirip jatyr», - deidi Daniiar Esin.
Jalpy, «Atamnyn Amanaty» soǵys kezinde habar-osharsyz ketken 600-den astam sarbazdy tapqan. 2019 jyly «Atamnyn Amanaty» QR Qorǵanys ministrligi jáne Almaty, Aqmola, Qaraǵandy, Soltústik Qazaqstan oblystarynyń ákimdikterimen birlesip, Ekinshi dúniejúzilik soǵys kezinde qaza tapqan 5 sarbaz ben ofitserdiń súiekterin áskeri qurmetin saqtai otyryp, saltanatty túrde elge jetkizgen bolatyn.
Marapattaý rásimine qatysqan Resei yntymaqtastyǵy ókildiginiń basshysy Aleksei Koropchenko ata-babalarymyz týraly estelikterdi jańǵyrtýda «Atamnyn Amanaty» qoǵamdyq birlestiginiń mańyzdylyǵyna toqtalyp, jastardyń sana-sezimin oiata alatyn úlken joba ekendigin atap ótti.
«Bul marapat – tarihi jadymyzdy qalpyna keltirý úshin tynbai eńbektenip júrgen zamandastarymyzdyń jumysyna berilgen baǵa. Biz «Rýhani jańǵyrý» jobalarynyń akseleratsiiasyndamyz. Osy oraida óz tájiribemizben bólisýge árdaiym daiynbyz», - deidi «Atamnyn Amanaty» basqarmasynyń tóraǵasy Murat Moldaǵaliev.
