بٷگٸن نۇر-سۇلتان قالاسىندا «Atamnyn Amanaty» قوعامدىق بٸرلەستٸگٸن «جىلى جٷرەك» بٷكٸلرەسەيلٸك سىيلىعىمەن ماراپاتتاۋ شاراسى ٶتتٸ, دەپ حابارلايدى "ۇلت اقپارات".
«Atamnyn Amanaty» ۇيىمى ەكٸنشٸ دٷنيەجٷزٸلٸك سوعىس كەزٸندە قازاقستاندىق ساربازداردىڭ جەرلەنگەن جەرلەرٸن انىقتاپ, مۇراعاتتىق-ٸزدەستٸرۋ جۇمىستارىمەن اينالىسادى. بيىل ۇيىم «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باستاماسىمەن قولعا الىنعان «ٶزگەرٸستەر سارۋارلارى» اكسەلەراتسيياسىنىڭ جەڭٸمپازى رەتٸندە ٷزدٸك 20 جوبانىڭ تٸزٸمٸنە ەنگەن. «رۋحاني جاڭعىرۋ» ققدي تٶراعاسى دانييار ەسيننٸڭ ايتۋىنشا, جوبا قازاقستاندىقتاردىڭ پاتريوتيزمٸ مەن وتانعا دەگەن سٷيٸسپەنشٸلٸك سەزٸمٸنە باعىتتالعان.
- «Atamnyn Amanaty» ۇيىمىنىڭ ٶكٸلدەرٸ قوعامدىق سانانى جاڭعىرتۋ بويىنشا «رۋحاني جاڭعىرۋ» باعدارلاماسىنىڭ ناعىز ەلشٸلەرٸنە اينالدى. بۇل ٶز ەلٸنٸڭ تاريحي مۇراسىنا بەي-جاي قارامايتىن جاس قازاقستاندىقتاردان قۇرالعان ۇيىم. بٷگٸنگٸنٸڭ باتىرلارى دەسەك تە بولادى. ٶيتكەنٸ, ەكٸنشٸ دٷنيەجٷزٸلٸك سوعىس كەزٸندە حابار-وشارسىز كەتكەندەردٸ ٸزدەپ, ولاردىڭ مەڭگٸ ەستە قالۋى ٷشٸن مۇراعاتتىق-ٸزدەستٸرۋ جۇمىستارىن جٷرگٸزٸپ جاتقاندىقتارى ٷلكەن ەرلٸك. مايداندا سوعىسقان 1,5 ميلليون قازاقستاندىقتىڭ 270 مىڭى حابار-وشارسىز كەتكەن. ارادا تالاي جىل ٶتتٸ. سول كەزدەگٸ كۋەگەرلەردٸڭ كٶبٸ بٷگٸندە ٶمٸردە جوق. ياعني, دەرەكتەردٸڭ جويىلعانىنا بايلانىستى ٸز-تٷزسٸز جوعالعانداردى تابۋ ٶتە قيىن. سوعان قاراماستان «Atamnyn Amanaty» ۇيىمى تاباندىلىق تانىتىپ, تالاي ساربازدى تابۋعا ەڭبەك سٸڭٸرٸپ جاتىر», - دەيدٸ دانييار ەسين.
جالپى, «Atamnyn Amanaty» سوعىس كەزٸندە حابار-وشارسىز كەتكەن 600-دەن استام ساربازدى تاپقان. 2019 جىلى «Atamnyn Amanaty» قر قورعانىس مينيسترلٸگٸ جەنە الماتى, اقمولا, قاراعاندى, سولتٷستٸك قازاقستان وبلىستارىنىڭ ەكٸمدٸكتەرٸمەن بٸرلەسٸپ, ەكٸنشٸ دٷنيەجٷزٸلٸك سوعىس كەزٸندە قازا تاپقان 5 سارباز بەن وفيتسەردٸڭ سٷيەكتەرٸن ەسكەري قۇرمەتٸن ساقتاي وتىرىپ, سالتاناتتى تٷردە ەلگە جەتكٸزگەن بولاتىن.
ماراپاتتاۋ رەسٸمٸنە قاتىسقان رەسەي ىنتىماقتاستىعى ٶكٸلدٸگٸنٸڭ باسشىسى الەكسەي كوروپچەنكو اتا-بابالارىمىز تۋرالى ەستەلٸكتەردٸ جاڭعىرتۋدا «Atamnyn Amanaty» قوعامدىق بٸرلەستٸگٸنٸڭ ماڭىزدىلىعىنا توقتالىپ, جاستاردىڭ سانا-سەزٸمٸن وياتا الاتىن ٷلكەن جوبا ەكەندٸگٸن اتاپ ٶتتٸ.
«بۇل ماراپات – تاريحي جادىمىزدى قالپىنا كەلتٸرۋ ٷشٸن تىنباي ەڭبەكتەنٸپ جٷرگەن زامانداستارىمىزدىڭ جۇمىسىنا بەرٸلگەن باعا. بٸز «رۋحاني جاڭعىرۋ» جوبالارىنىڭ اكسەلەراتسيياسىندامىز. وسى ورايدا ٶز تەجٸريبەمٸزبەن بٶلٸسۋگە ەردايىم دايىنبىز», - دەيدٸ «Atamnyn Amanaty» باسقارماسىنىڭ تٶراعاسى مۇرات مولداعاليەۆ.
