Foto: dauletten.kz
Astanada sheteldik azamat ózin Ulttyq bank qyzmetkeri retinde tanystyryp, qala turǵynyn 21 million teńgesinen aiyrdy. Quqyq qorǵaý organdary kúdiktini “Anti-fraud” jedel aldyn alý is-sharasy barysynda ustady, dep habarlaidy Ult.kz.
Tergeý málimetinshe, alaiaq jábirlenýshige telefon arqyly habarlasyp, onyń bank shotynan belgisiz tulǵalar aqsha sheshpek bolyp jatqanyn aityp sendirgen. Ol “qaýipsiz shotqa” aqsha aýdarýdy usynyp, bastapqyda 1 million teńgeni aýdartqan.
Keiin iske basqa da alaiaqtar qosylyp, ózderin quqyq qorǵaý organdarynyń qyzmetkerleri retinde tanystyrǵan. Olar “tergeý júrip jatyr” degen jeleýmen jábirlenýshini aldap, onyń barlyq jinaǵyn tekserý úshin “arnaiy kýrerge” berýge kóndirgen.
Nátijesinde azamat bank shotynan 21 million teńgeni sheship alyp, qolma-qol aqsha túrinde kýrerge tabystaǵan.
Jedel-izdestirý barysynda politsiia kúdiktini qolǵa túsirdi. Ol qarajatty túrli shottarǵa aýdaryp otyrǵan shetel azamaty ekeni anyqtaldy.
Qazirgi ýaqytta kúdikti qamaýǵa alynyp, is boiynsha tergeý jalǵasyp jatyr.
Astana qalasynda bolǵan bul oqiǵa boiynsha quqyq qorǵaý organdary azamattardy bank qyzmetkerleri atynan jasalatyn qońyraýlarǵa saq bolýǵa shaqyrdy.
