فوتو: dauletten.kz
استانادا شەتەلدٸك ازامات ٶزٸن ۇلتتىق بانك قىزمەتكەرٸ رەتٸندە تانىستىرىپ, قالا تۇرعىنىن 21 ميلليون تەڭگەسٸنەن ايىردى. قۇقىق قورعاۋ ورگاندارى كٷدٸكتٸنٸ “Anti-fraud” جەدەل الدىن الۋ ٸس-شاراسى بارىسىندا ۇستادى, دەپ حابارلايدى Ult.kz.
تەرگەۋ مەلٸمەتٸنشە, الاياق جەبٸرلەنۋشٸگە تەلەفون ارقىلى حابارلاسىپ, ونىڭ بانك شوتىنان بەلگٸسٸز تۇلعالار اقشا شەشپەك بولىپ جاتقانىن ايتىپ سەندٸرگەن. ول “قاۋٸپسٸز شوتقا” اقشا اۋدارۋدى ۇسىنىپ, باستاپقىدا 1 ميلليون تەڭگەنٸ اۋدارتقان.
كەيٸن ٸسكە باسقا دا الاياقتار قوسىلىپ, ٶزدەرٸن قۇقىق قورعاۋ ورگاندارىنىڭ قىزمەتكەرلەرٸ رەتٸندە تانىستىرعان. ولار “تەرگەۋ جٷرٸپ جاتىر” دەگەن جەلەۋمەن جەبٸرلەنۋشٸنٸ الداپ, ونىڭ بارلىق جيناعىن تەكسەرۋ ٷشٸن “ارنايى كۋرەرگە” بەرۋگە كٶندٸرگەن.
نەتيجەسٸندە ازامات بانك شوتىنان 21 ميلليون تەڭگەنٸ شەشٸپ الىپ, قولما-قول اقشا تٷرٸندە كۋرەرگە تابىستاعان.
جەدەل-ٸزدەستٸرۋ بارىسىندا پوليتسييا كٷدٸكتٸنٸ قولعا تٷسٸردٸ. ول قاراجاتتى تٷرلٸ شوتتارعا اۋدارىپ وتىرعان شەتەل ازاماتى ەكەنٸ انىقتالدى.
قازٸرگٸ ۋاقىتتا كٷدٸكتٸ قاماۋعا الىنىپ, ٸس بويىنشا تەرگەۋ جالعاسىپ جاتىر.
Astana قالاسىندا بولعان بۇل وقيعا بويىنشا قۇقىق قورعاۋ ورگاندارى ازاماتتاردى بانك قىزمەتكەرلەرٸ اتىنان جاسالاتىن قوڭىراۋلارعا ساق بولۋعا شاقىردى.
