Elordada baspanaǵa muqtaj 200 muǵalim jataqhanaǵa ornalastyrylady. Bul týraly búgin Astana qalalyq bilim basqarmasynyń basshysy Ánýar Janǵozin aitty, dep habarlaidy QazAqparat tilshisi.
«Birinshi jataqhana taiaý aralyqta paidalanýǵa beriledi. Biz shamamen 200 muǵalimdi ornalastyramyz dep josparlap otyrmyz. Qazir ótinimder jinaqtalyp jatyr, oǵan qaitadan kelgen muǵalimder de qosylady. Arnaiy qurylǵan komissiia quramyna qoǵam, túrli organ ókilderi kiredi. Bul jataqhana oryndaryn barynsha ádil bólý úshin jasalǵan», - dedi basqarma basshysy.
Sonymen qatar ol elordada baǵasy qoljetimdi, sapasy joǵary hostelderdiń bar ekendigin atap ótti. Olarǵa óńirlerden jańadan kelgen jas muǵalimderdi ornalastyrýǵa múmkindik bar.Munan bólek, basqarma basshysy stýdentterdi hostelderge jaiǵastyrý máselesine toqtaldy.
«Aǵymdaǵy jyly ákim bastamasymen stýdentterdiń turýy úshin hostelderdi irikteý júrgizip jatyrmyz. Birinshi irikteýdi ótkizdik. Usynylǵan 5000 orynnan komissiia 4 myńyn iriktep aldy. Bul bizdiń qajettiligimizdi tolyqtai jaba almaidy. Sondyqtan taiaý ýaqytta baiqaý jariialanady. Barlyq hostelder men qonaq úi úilerin baiqaýǵa qatysýǵa shaqyramyz», - dedi Ánýar Janǵozin.
