Foto: Aqorda
Aqordada elimizge resmi saparmen kelgen Cheh Respýblikasynyń Premer-ministri Andrei Babishti qarsy alý rásimi ótti, dep habarlaidy Ult.kz.
Memleket basshysy Qasym-Jomart Toqaev pen Chehiia Premer-ministri Andrei Babish shaǵyn quramda kelissóz júrgizdi.
Qasym-Jomart Toqaev Andrei Babishke iltipat bildirip, Qazaqstan jurtshylyǵy ony Cheh Respýblikasynda ǵana emes, Eýropaǵa belgili saiasi qairatker retinde jaqsy biletinin jetkizdi.
– Eki el arasynda burynnan tyǵyz ári dostyq qarym-qatynas ornaǵan. Saýda-sattyq tabysty damýda. Qos halyqtyń bir birine qurmeti zor. Iri halyqaralyq qurylymdar sheńberinde birlese áreket etip kelemiz. Bul – óte mańyzdy. Elshilikterimiz belsendi jumys istep tur. Oraily sátti paidalana otyryp, Ózińizben birge cheh kásipkerlerinen quralǵan úlken delegatsiia alyp kelgenińiz úshin alǵys aitamyn. Keshe Astanada biznes-forým ótti. Onyń nátijesi elderimizge paidaly bolady dep oilaimyn. Óz tarapymnan san qyrly yntymaqtastyǵymyzdy odan ári damytýǵa bar kúshimdi salamyn, – dedi Prezident.
Andrei Babish qonaqjailyq tanytqany úshin Qasym-Jomart Toqaevqa rizashylyǵyn bildirip, elimizdiń túrli salada jetken jetistikterine joǵary baǵa berdi.
– Qazaqstan – Ortalyq Aziiadaǵy asa mańyzdy memleket. Sondyqtan osynaý ǵajap elge saparmen kelý – men úshin zor mártebe. Jaqynda jańa Konstitýtsiia qabyldadyńyzdar. Qutty bolsyn! Sizderdiń bul baǵyttaǵy tájiribelerińiz bizge de paidaly bolady dep esepteimin. Qazaqstanǵa kelý kópten bergi armanym edi. Óitkeni men ýniversitetti aiaqtaǵannan keiin, iaǵni, 1978 jyly Shymkent jáne Jambyl (Taraz) qalalarymen ózara bailanys ornatqan departamentte jumys istedim. Qazaqstan – energetika salasynda asa úlken orny bar el, álemdegi ýran óndiretin iri memleketterdiń qataryna kiredi. Búginde atom elektr stantsiialarynyń mańyzy arta tústi. Sol sebepti osy salada kelisimge kelgenimizge qýanyshtymyn. Qazaqstannyń jasandy intellekt baǵytyndaǵy jetistikteri tańqalarlyq. Eki elge ortaq dúnie kóp. Chehiia men Qazaqstan úkimetteri ózara yntymaqtastyqty odan ári ilgeriletý úshin aianbai eńbek etedi dep oilaimyn, – dedi ol.
