Astanada LRT qoldanysqa berilgenine kóp ýaqyt bolǵan joq. Alǵashqy kezeń bolǵandyqtan ba, halyq ony qoǵamdyq kólik retinde emes, attraktsion siiaqty paidalanyp júrgendei. Astanaǵa demalysqa kelgen otbasylar men foto, videoǵa túsý úshin mingen blogerlerlerdiń qarasy qalyń. Ishi shý, retsiz, orynsyz qozǵalys kóp baiqalady.
Basynda osyndai bolýy qalypty da siiaqty. Álemde jańa qoǵamdyq kólik júiesi iske qosylǵan alǵashqy ýaqytta ol tek kólik quraly ǵana emes, belgili bir deńgeide týristik nysanǵa da ainalady eken. Sondyqtan, dittegen jerine jetýdi maqsat etken jolaýshylardan bólek, demalyp júrgen otbasylar da, blogerler de LRT-ni “synap kórý” maqsatynda paidalanyp júr.
Abzalynda
Astana – elimizdiń mádeni ortalyǵy jáne basqalarǵa úlgi bolýy kerek bas qalasy. Sol sebepti keleshekte Astananyń basty qoǵamdyq kólik qozǵalysy sol jergilikti halyq mádenietiniń bir kórinisi bolýy kerek. Máselen biz qyzyǵatyn Japoniia, Qytai elderindegi metro tártibi bir kúnde qalyptasqan joq. Onyń artynda uzaq jyldar boiy júrgizilgen jan-jaqty tárbie men túsindirý jumystary jatyr. Ondai jumystardyń biri – mektep qabyrǵasynan bastalsa, endi biri – dál sol LRT ainalasynda júrýi kerek. Tárbie saǵattarynda balalarǵa tazalyq, tártip, eshkimge ziian keltirmeý qaǵidasynda LRT-men júrý tártibine arnaiy sabaq arnap, arnaiy ekskýrsiiaǵa ákelip is júzinde kórsetý balalardyń máńgi esinde qalatyn dúnie.
Kez kelgen jolaýshy poiyz ishinde kóretindei túsindirme maqsatta jasalǵan súikimdi beinerolikterdiń de áseri zor bolatyn edi. Odan bólek, árine LRT ainalasyndaǵy qyzmetkerler adamdardy jyly qarsy alyp, sypaiy eskertý jasasa, poiyzǵa kirip bara jatqan jolaýshylar da sol daýys pen árekettegi sypaiylyqqa, tártipke de beiimdeler edi.
