Foto: ashyq derekkóz
Astanada zańsyz salynyp jatqan turǵyn úi keshenderi áshkerelendi, dep habarlaidy Ult.kz.
Qalalyq sáýlet basqarmasy, «Astana Genplan» JShS jáne Memlekettik sáýlet-qurylys baqylaýy basqarmasy júrgizgen birlesken tekserýler barysynda elordadaǵy birqatar qurylys alańdarynda óreskel zań buzýshylyqtar anyqtaldy.
«Nura» aýdany prokýratýrasy zańsyz qurylystardy anyqtaý jáne olardyń jolyn kesý baǵytyndaǵy jumystardy kúsheitken. Tekserý nátijesinde Sh. Aitmatov kóshesi, 24/8 ýchaskesi mańynda japsarlas úi-jailary men parkingi bar kópqabatty turǵyn úi kesheni zańsyz salynyp jatqany belgili boldy. Qurylys jumystary eshqandai saraptamanyń oń qorytyndysynsyz jáne tiisti habarlama berilmei júrgizilgen.
Sondai-aq, Sh. Aitmatov pen E164 kósheleriniń qiylysynda ornalasqan taǵy bir turǵyn úi kesheniniń qurylysy da zań talaptaryn óreskel buza otyryp júzege asyrylǵan. Nysan jer telimine quqyqsyz, jobalyq-smetalyq qujattamasyz, saraptama qorytyndysynsyz jáne qurylys bastalǵany týraly habarlamasyz salynyp jatqan.
Prokýratýra toqtatý týraly talaptarǵa qaramastan zańdy elemegen qurylys salýshylarǵa erekshe nazar aýdaryp otyr. Qala qurylysy salasyndaǵy zańdylyqty saqtaý turaqty baqylaýǵa alynǵan.
Elorda prokýratýrasy qurylys salýshylarǵa zań talaptaryn saqtamaǵany úshin jaýapkershilik qarastyrylǵanyn eskertip, belgilengen normalardy qatań ustanýǵa shaqyrdy.
