Búgin Astana qalasy, Astana balet teatrynda Esmuhan Obaev jáne Tóleýbek Aralbaidyń rejisserlik sheshimimen «Úmit úzgim kelmeidi» qoiylymy «EKSPO-2017» Halyqaralyq mamandandyrylǵan kórmesiniń qonaqtaryna jol tartty.
Jazýshy – adam janynyń zergeri. Jazýshy kúndelikti kúibeń tirshilikti, adam bolmysynyń qymqýyt shielenisken qyrlaryn ózdiginshe paiymdap, oqyrmannyń oilaý jáne qabyldaý atty fýnktsiialaryna salmaq salady. Rejisser avtor-jazýshy dúniege ákelgen kórkem týyndynyń qalyń kópshilikpen qaýyshýyna jol ashatyn altyn kópir ispettes. Taǵy bir kórkem týyndynyń kórkem kóriniske ainalýyna muryndyq bolǵan shyǵarma - jazýshy Nemat Kelimbetovtiń «Úmit úzgim kelmeidi» hikaiat-monology.
Oqiǵasy aýrýhana palatasynda ótetin dramanyń bas keiipkeri, búginde jasy jetpisti alqymdaǵan Meiirbek baqyt týraly, ómirdiń máni týraly tuńǵiyq oiǵa shomady. Onyń jaqyn dostarymen ózara pikirtalas-oi taratýlarynan ózindik dúnietanymy men ómir ustanymdy aiqyn tanylady. Dáýlet - jan dáýletimen, Asylhan – týǵan topyraqtan ajyramaǵan handyǵymen, Meiirbek – qudaidyń ózi ólshep bergen azdy-kópti ómirine yrzashylyǵy, qanaǵatymen daralanady. Dostardyń arasynda ómirlik jolyn, bálkim, durys tańdamaǵan Sovetbektiń ókinishi kóp… Dramada adamgershilik, imandylyq máseleleri kóteriledi.
Aýyr naýqasqa shaldyǵyp, uzaq jyldar boiy tósekke tańylǵan múgedek jannyń ómirge degen sheksiz qushtarlyǵy, qaisarlyǵy, adamgershiligi, móldir mahabbaty Tóleýbek Aralbaidyń keiipker obrazyn somdaý barysynda shynaiy kórinis taba bildi. Jalǵas Tolǵanbai, Azat Seitmetov, Aidos Bektemir, Gúlshat Tutova syndy oryndaýshylar óz keiipkerleriniń bolmysyn, harakteri men obrazdyq daralyǵyn tanytyp, kórermenderdi ónerlerimen tánti etti.
Avtorlyq kózqaras, jazýshylyq paiym jáne rejisserlik sheshim ózara qiiýlasyp, bir bútin dúniege ainaldy. Nátije – kúni búginde ózektiligin joimaǵan áleýmettik másele. Ol másele – adam jany, adam bolmysy jáne adamgershilik.
«Úmit úzgim kelmeidi» - adamzat balasynyń erteńine senimi, bolashaqqa bastaityn dańǵyl joly. Rasynda, adam balasy keleshekke degen senimmen úmitpen ómir súredi. Al berik senim setinese, úlbiregen úmit úzilse ne bolmaq? Beibit ómir, ózara kelisim, adamzattyq asyl qundylyqtar ulyqtalatyn bul qoiylymnan óz saýaldaryńyzdyń jaýabyn taba alasyzdar.
