بٷگٸن استانا قالاسى, استانا بالەت تەاترىندا ەسمۇحان وباەۆ جەنە تٶلەۋبەك ارالبايدىڭ رەجيسسەرلٸك شەشٸمٸمەن «ٷمٸت ٷزگٸم كەلمەيدٸ» قويىلىمى «ەكسپو-2017» حالىقارالىق مامانداندىرىلعان كٶرمەسٸنٸڭ قوناقتارىنا جول تارتتى.
جازۋشى – ادام جانىنىڭ زەرگەرٸ. جازۋشى كٷندەلٸكتٸ كٷيبەڭ تٸرشٸلٸكتٸ, ادام بولمىسىنىڭ قىمقۋىت شيەلەنٸسكەن قىرلارىن ٶزدٸگٸنشە پايىمداپ, وقىرماننىڭ ويلاۋ جەنە قابىلداۋ اتتى فۋنكتسييالارىنا سالماق سالادى. رەجيسسەر اۆتور-جازۋشى دٷنيەگە ەكەلگەن كٶركەم تۋىندىنىڭ قالىڭ كٶپشٸلٸكپەن قاۋىشۋىنا جول اشاتىن التىن كٶپٸر ٸسپەتتەس. تاعى بٸر كٶركەم تۋىندىنىڭ كٶركەم كٶرٸنٸسكە اينالۋىنا مۇرىندىق بولعان شىعارما - جازۋشى نەمات كەلٸمبەتوۆتٸڭ «ٷمٸت ٷزگٸم كەلمەيدٸ» حيكايات-مونولوگى.
وقيعاسى اۋرۋحانا پالاتاسىندا ٶتەتٸن درامانىڭ باس كەيٸپكەرٸ, بٷگٸندە جاسى جەتپٸستٸ القىمداعان مەيٸربەك باقىت تۋرالى, ٶمٸردٸڭ مەنٸ تۋرالى تۇڭعيىق ويعا شومادى. ونىڭ جاقىن دوستارىمەن ٶزارا پٸكٸرتالاس-وي تاراتۋلارىنان ٶزٸندٸك دٷنيەتانىمى مەن ٶمٸر ۇستانىمدى ايقىن تانىلادى. دەۋلەت - جان دەۋلەتٸمەن, اسىلحان – تۋعان توپىراقتان اجىراماعان حاندىعىمەن, مەيٸربەك – قۇدايدىڭ ٶزٸ ٶلشەپ بەرگەن ازدى-كٶپتٸ ٶمٸرٸنە ىرزاشىلىعى, قاناعاتىمەن دارالانادى. دوستاردىڭ اراسىندا ٶمٸرلٸك جولىن, بەلكٸم, دۇرىس تاڭداماعان سوۆەتبەكتٸڭ ٶكٸنٸشٸ كٶپ… درامادا ادامگەرشٸلٸك, يماندىلىق مەسەلەلەرٸ كٶتەرٸلەدٸ.
اۋىر ناۋقاسقا شالدىعىپ, ۇزاق جىلدار بويى تٶسەككە تاڭىلعان مٷگەدەك جاننىڭ ٶمٸرگە دەگەن شەكسٸز قۇشتارلىعى, قايسارلىعى, ادامگەرشٸلٸگٸ, مٶلدٸر ماحابباتى تٶلەۋبەك ارالبايدىڭ كەيٸپكەر وبرازىن سومداۋ بارىسىندا شىنايى كٶرٸنٸس تابا بٸلدٸ. جالعاس تولعانباي, ازات سەيتمەتوۆ, ايدوس بەكتەمٸر, گٷلشات تۇتوۆا سىندى ورىنداۋشىلار ٶز كەيٸپكەرلەرٸنٸڭ بولمىسىن, حاراكتەرٸ مەن وبرازدىق دارالىعىن تانىتىپ, كٶرەرمەندەردٸ ٶنەرلەرٸمەن تەنتٸ ەتتٸ.
اۆتورلىق كٶزقاراس, جازۋشىلىق پايىم جەنە رەجيسسەرلٸك شەشٸم ٶزارا قييۋلاسىپ, بٸر بٷتٸن دٷنيەگە اينالدى. نەتيجە – كٷنٸ بٷگٸندە ٶزەكتٸلٸگٸن جويماعان ەلەۋمەتتٸك مەسەلە. ول مەسەلە – ادام جانى, ادام بولمىسى جەنە ادامگەرشٸلٸك.
«ٷمٸت ٷزگٸم كەلمەيدٸ» - ادامزات بالاسىنىڭ ەرتەڭٸنە سەنٸمٸ, بولاشاققا باستايتىن داڭعىل جولى. راسىندا, ادام بالاسى كەلەشەككە دەگەن سەنٸممەن ٷمٸتپەن ٶمٸر سٷرەدٸ. ال بەرٸك سەنٸم سەتٸنەسە, ٷلبٸرەگەن ٷمٸت ٷزٸلسە نە بولماق? بەيبٸت ٶمٸر, ٶزارا كەلٸسٸم, ادامزاتتىق اسىل قۇندىلىقتار ۇلىقتالاتىن بۇل قويىلىمنان ٶز ساۋالدارىڭىزدىڭ جاۋابىن تابا الاسىزدار.
