Foto: gov.kz
Astanadaǵy Prezidenttik ortalyqta QR Mádeniet jáne aqparat ministrliginiń uiymdastyrýymen «Ulttyq kitap» respýblikalyq baiqaýy jeńimpazdaryn marapattaý rásimi ótti. Is-shara Memleket basshysy Qasym-Jomart Toqaevtyń bastamasymen bekitilgen Ulttyq kitap kúni aiasynda uiymdastyryldy. Bul týraly QR Mádeniet jáne aqparat ministrliginiń baspasóz qyzmetine silteme jasap Ult.kz habarlaidy.
Saltanatty jiyn Qazaqstan Respýblikasy Prezidentiniń ishki saiasat máseleleri jáne kommýnikatsiialar jónindegi kómekshisi Arman Qyryqbaevtyń quttyqtaý sózimen ashyldy.
Foto: gov.kz
«Memleket basshysy árdaiym qoǵamda kitap oqý mádenietin damytýǵa erekshe mán beredi. 2024 jyly Ulttyq quryltaidyń úshinshi otyrysynda Prezident «Kitap oqityn ult» tujyrymdamasyn usynǵan edi. Atalǵan tujyrymdama negizinde byltyrdan bastap 23 sáýir Ulttyq kitap kúni bolyp belgilendi», – dedi Arman Qyryqbaev.
Sondai-aq, Prezident kómekshisi aldaǵy eki aptada Memleket basshysy kitap oqý mádenietin keńinen nasihattaýǵa jáne ziiatker ult qalyptastyrýǵa baǵyttalǵan arnaiy Jarlyqqa qol qoiatynyn jetkizdi.
Is-sharaǵa Parlament depýtattary, belgili aqyn-jazýshylar, memleket jáne qoǵam qairatkerleri, sondai-aq kitaphana basshylary qatysty.
«Ulttyq kitap» respýblikalyq baiqaýy otandyq avtorlardy qoldaýǵa, baspa isin damytýǵa jáne qazaq ádebietiniń, rýhaniiatynyń damýyna baǵyttalǵan. Biyl baiqaýǵa 32 baspadan 155 ótinim tústi. Qatysýshylar sońǵy eki jylda jaryq kórgen otandyq avtorlardyń shyǵarmalaryn usyndy.
Jeńimpazdar toǵyz nominatsiia boiynsha anyqtaldy. Olardyń qatarynda «Balalarǵa arnalǵan úzdik kitap», «Úzdik komiks», «Non-fikshn baǵytyndaǵy úzdik kitap», «Detektiv janryndaǵy úzdik kitap», «Satira janryndaǵy úzdik kitap», «Úzdik illiýstratsiialyq kitap», «Úzdik aýdarma kitap», «Fantastika janryndaǵy úzdik kitap» jáne «Úzdik baspa» bar. Sonymen qatar «Jyl kitaby» atalymy boiynsha jeńimpaz esimi belgili boldy. Bul marapat Abai Qunanbaiulynyń qara sózderi negizinde jazylǵan «Urpaqqa ósiet» kitaby úshin Gúlmira Amandyqovaǵa tabystaldy. Barlyq jeńimpazǵa aqshalai syilyqtar berildi.
Foto: gov.kz
«Ulttyq kitap» baiqaýy otandyq qalamgerler men baspagerlerdiń eńbegin dáripteitin mańyzdy alań retinde qalyptasyp, kitap oqý mádenietin nyǵaitýǵa jáne qoǵamnyń qazaq ádebietine degen qyzyǵýshylyǵyn arttyrýǵa yqpal etip keledi.
Saltanatty rásim aiasynda elimizdiń túkpir-túkpirinen kelgen kitaphanashylar men baspa salasynyń ókilderi «Mádeniet salasynyń úzdigi» tósbelgisimen jáne «Qurmet» gramotasymen marapattaldy.
Ulttyq kitap kúnine arnalǵan kitap aptalyǵy aiasynda búgin el kóleminde sońǵy kún «Kitap – dostyq ambassadory» ataýymen ótti. Bul kún otandyq ádebietti shetel oqyrmany arasynda nasihattaýǵa baǵyttaldy.
Kitap aptalyǵynyń sońǵy kúninde respýblika boiynsha kitaphanalarda, mádeniet jáne bilim berý uiymdarynda shyǵarmalary shet tilderge aýdarylǵan qazaqstandyq avtorlardyń, sondai-aq kásibi aýdarmashylar men baspagerlerdiń qatysýymen kezdesýler uiymdastyryldy.
Atap aitqanda, Astanada IX «Astana Eurasian Book Fair – 2026» halyqaralyq kitap kórme-jármeńkesi aiasynda kitap tanystyrylymdary ótip, Halyq jazýshysy, aqyn Muhtar Shahanovtyń shyǵarmashylyǵyna arnalǵan «Ǵasyrdyń ǵalamat aqyny» kórmesi usynyldy. Almaty qalasynda «Álemdi biriktirgen – Qazaq kitaby» atty ádebi kvest ótkizilip, Berdibek Soqpaqbaevtyń «Meniń atym Qoja» povesiniń shet tilderdegi aýdarmalary tanystyryldy. Sondai-aq «Qazaq ádebieti – álem tilderinde» atty kitap kórmesi uiymdastyryldy.
Jalpy, kitap aptalyǵy aiasynda el kóleminde ótken is-sharalarǵa 200 myńǵa jýyq adam qatysty.
Aita keteiik, erteń, 23 sáýir kúni Qazaqstanda Memleket basshysynyń bastamasymen bekitilgen Ulttyq kitap kúni atap ótiledi. Ataýly kún halyqtyń kitap oqýǵa degen qyzyǵýshylyǵyn arttyrýǵa, oqý mádenietin jańǵyrtýǵa jáne ziiatkerlik áleýetti damytýǵa baǵyttalǵan.
