Foto: ashyq derekkóz
Qarjy monitoringi agenttigi Astana qalasy boiynsha departamenti asa iri kólemdegi alaiaqtyq deregi boiynsha birneshe qurylys kompaniiasynyń basshysy Móldir Sýiýnshalige qatysty tergep-tekserý júrgizip jatyr, dep habarlaidy Ult.kz.
Tergeý málimetinshe, 2021–2024 jyldar aralyǵynda kúdikti «Nura Elite» kottedj qalashyǵyn salý syltaýymen azamattardan qarajat tartqan. Joba aiasynda 37 kottedj jáne 24 taýnhaýs salý josparlanǵan. Alaida qazirgi tańda taýnhaýstar tolyq aiaqtalmaǵan, tek qańqalary ǵana tur. 2023 jyldyń tórtinshi toqsanyna deiin nysandy tapsyrý jónindegi mindettemeler oryndalmaǵan.
Satyp alýshylarmen aldyn ala satyp alý-satý sharttary jasalǵan. Nátijesinde 56 adam jábirlenýshi retinde tanylyp, keltirilgen shyǵyn kólemi 3,9 mlrd teńgeni quraǵan. Tergeý derekterine sáikes, onyń ishinde 322 mln teńge kúdiktiniń, onyń jubaiy men anasynyń esepshottaryna aýdarylǵan, al 145 mln teńge qolma-qol aqshaǵa ainaldyrylǵan.
Sondai-aq bir jyljymaityn múlikti birneshe ret satý faktileri anyqtalǵan. Máselen, tolyq tólengen kottedjderdiń biri kepilge qoiylyp, keiin úshinshi tulǵalardyń atyna rásimdelip, birneshe ret qaita satylǵan. Tergeý barysynda kúdiktiniń jer ýchaskelerine quqyq berýdi kózdeitin sharttar jasasqany, alaida olardy ielikten shyǵarýǵa zańdy quqyǵy bolmaǵany belgili boldy.
Úleskerlerdiń qarajatynyń bir bóligi Astanadaǵy «Asylhan» turǵyn úi keshenine arnalǵan jer telimin satyp alýǵa jumsalǵan. Sonymen qatar qurylysqa qajetti ruqsat qujattary bolmaǵanyna qaramastan, «Biz birgemiz» qaiyrymdylyq qory arqyly muqtaj áielge páter beriletini týraly aqparat jariialanǵan. Alaida is júzinde turǵyn úi kesheniniń qurylysy bastalmaǵan.
Sot sanktsiiasymen kúdiktige úi qamaq túrindegi bultartpaý sharasy qoldanyldy. Qazirgi ýaqytta tergeý amaldary jalǵasýda.
