فوتو: اشىق دەرەككٶز
قارجى مونيتورينگٸ اگەنتتٸگٸ استانا قالاسى بويىنشا دەپارتامەنتٸ اسا ٸرٸ كٶلەمدەگٸ الاياقتىق دەرەگٸ بويىنشا بٸرنەشە قۇرىلىس كومپانيياسىنىڭ باسشىسى مٶلدٸر سۋيۋنشاليگە قاتىستى تەرگەپ-تەكسەرۋ جٷرگٸزٸپ جاتىر, دەپ حابارلايدى Ult.kz.
تەرگەۋ مەلٸمەتٸنشە, 2021–2024 جىلدار ارالىعىندا كٷدٸكتٸ «Nura Elite» كوتتەدج قالاشىعىن سالۋ سىلتاۋىمەن ازاماتتاردان قاراجات تارتقان. جوبا اياسىندا 37 كوتتەدج جەنە 24 تاۋنحاۋس سالۋ جوسپارلانعان. الايدا قازٸرگٸ تاڭدا تاۋنحاۋستار تولىق اياقتالماعان, تەك قاڭقالارى عانا تۇر. 2023 جىلدىڭ تٶرتٸنشٸ توقسانىنا دەيٸن نىساندى تاپسىرۋ جٶنٸندەگٸ مٸندەتتەمەلەر ورىندالماعان.
ساتىپ الۋشىلارمەن الدىن الا ساتىپ الۋ-ساتۋ شارتتارى جاسالعان. نەتيجەسٸندە 56 ادام جەبٸرلەنۋشٸ رەتٸندە تانىلىپ, كەلتٸرٸلگەن شىعىن كٶلەمٸ 3,9 ملرد تەڭگەنٸ قۇراعان. تەرگەۋ دەرەكتەرٸنە سەيكەس, ونىڭ ٸشٸندە 322 ملن تەڭگە كٷدٸكتٸنٸڭ, ونىڭ جۇبايى مەن اناسىنىڭ ەسەپشوتتارىنا اۋدارىلعان, ال 145 ملن تەڭگە قولما-قول اقشاعا اينالدىرىلعان.
سونداي-اق بٸر جىلجىمايتىن مٷلٸكتٸ بٸرنەشە رەت ساتۋ فاكتٸلەرٸ انىقتالعان. مەسەلەن, تولىق تٶلەنگەن كوتتەدجدەردٸڭ بٸرٸ كەپٸلگە قويىلىپ, كەيٸن ٷشٸنشٸ تۇلعالاردىڭ اتىنا رەسٸمدەلٸپ, بٸرنەشە رەت قايتا ساتىلعان. تەرگەۋ بارىسىندا كٷدٸكتٸنٸڭ جەر ۋچاسكەلەرٸنە قۇقىق بەرۋدٸ كٶزدەيتٸن شارتتار جاساسقانى, الايدا ولاردى يەلٸكتەن شىعارۋعا زاڭدى قۇقىعى بولماعانى بەلگٸلٸ بولدى.
ٷلەسكەرلەردٸڭ قاراجاتىنىڭ بٸر بٶلٸگٸ استاناداعى «اسىلحان» تۇرعىن ٷي كەشەنٸنە ارنالعان جەر تەلٸمٸن ساتىپ الۋعا جۇمسالعان. سونىمەن قاتار قۇرىلىسقا قاجەتتٸ رۇقسات قۇجاتتارى بولماعانىنا قاراماستان, «بٸز بٸرگەمٸز» قايىرىمدىلىق قورى ارقىلى مۇقتاج ەيەلگە پەتەر بەرٸلەتٸنٸ تۋرالى اقپارات جارييالانعان. الايدا ٸس جٷزٸندە تۇرعىن ٷي كەشەنٸنٸڭ قۇرىلىسى باستالماعان.
سوت سانكتسيياسىمەن كٷدٸكتٸگە ٷي قاماق تٷرٸندەگٸ بۇلتارتپاۋ شاراسى قولدانىلدى. قازٸرگٸ ۋاقىتتا تەرگەۋ امالدارى جالعاسۋدا.
