Qazaqstanda sheteldik qatysýy bar kompaniialar sany aitarlyqtai artty. 2026 jylǵy 1 tamyzdaǵy jaǵdai boiynsha elde 54 myń sheteldik kompaniia jumys istegen. Bul 1 maýsymdaǵy kórsetkishten 9,4 myńǵa nemese 21%-ǵa kóp, dep habarlaidy ult.kz lsm.kz portalyna silteme jasap.
Eń joǵary ósim Ózbekstan men Qytai kapitaly qatysatyn kompaniialar sany boiynsha baiqaldy.
Ózbekstannyń qatysýymen jumys isteitin kompaniialar sany eki aida 5,4 myńnan 10,6 myńǵa deiin ósken. Iaǵni olardyń sany shamamen 1,9 ese artqan.
Qytai kapitaly qatysatyn kompaniialar sany da eki esege jýyq kóbeiip, 4,3 myńnan 8,3 myńǵa jetken.
Sonymen qatar Qyrǵyzstan investorlary qatysatyn kompaniialar sany 19%-ǵa ósip, 2,3 myńǵa jetti. Úndistan kompaniialarynyń sany 21,5%-ǵa artyp, 441-ge, BAÁ kompaniialary 26%-ǵa ósip, 439-ǵa, Nigeriia kompaniialary 41%-ǵa kóbeiip, 258-ge jetken.
Reseilik kompaniialar sany azaidy
Qazaqstanda sheteldik biznes arasynda áli de Reseidiń qatysýymen jumys isteitin kompaniialar kósh bastap tur – 17 myń. Alaida jaz bastalǵaly olardyń sany 699 uiymǵa nemese 3,9%-ǵa azaiǵan.
Túrkiialyq kompaniialar sany 3,2%-ǵa tómendep, 3,2 myńǵa, Aýǵanstannan kelgen kompaniialar 9,7%-ǵa azaiyp, 425-ke jetken.
Sondai-aq Niderland kompaniialary 3%-ǵa, Belarýs kompaniialary 1,6%-ǵa, Ýkraina kompaniialary 0,7%-ǵa qysqarǵan.
Sheteldik biznes qai salaǵa kóp kelip jatyr?
Sheteldik investorlar úshin eń tartymdy baǵyttardyń biri – saýda salasy. Bul baǵytta 18,4 myń kompaniia jumys isteidi. Eki aida olardyń sany 18,8%-ǵa nemese 2,9 myńǵa artqan.
Al eń joǵary ósim qurylys salasynda tirkeldi. Maýsymnyń basynda bul salada 3,5 myń sheteldik kompaniia bolsa, 1 tamyzǵa qarai olardyń sany 6,3 myńǵa jetip, 1,8 esege ósken.
Óńdeý ónerkásibindegi kompaniialar sany 19,2%-ǵa ósip, 2,5 myńǵa jetti. Qyzmet kórsetý salasynda – 2,5 myń (+9,4%), kólik jáne qoimalaý salasynda 2 myń kompaniia (+6,9%) tirkelgen.
Sheteldik kompaniialardyń basym bóligi Almatyda
Sheteldik biznes eń kóp shoǵyrlanǵan qala – Almaty. Eki ai ishinde mundaǵy sheteldik kompaniialar sany 38,9%-ǵa ósip, 21 myńnan 29,2 myńǵa jetken.
Astanada olardyń sany 13,4%-ǵa artyp, 9,9 myńǵa, Shymkentte 8,3%-ǵa ósip, 1,4 myńǵa jetti.
Mańǵystaý oblysynda 2,8 myń (+2,5%), Qaraǵandy oblysynda 1,3 myń (+1,2%), Atyraý oblysynda 1,2 myń (+3,7%) sheteldik kompaniia jumys isteidi.
Al Qostanai oblysynda olardyń sany 6%-ǵa azaiyp, 1,1 myńǵa deiin tómendegen.
