قازاقستاندا شەتەلدٸك قاتىسۋى بار كومپانييالار سانى ايتارلىقتاي ارتتى. 2026 جىلعى 1 تامىزداعى جاعداي بويىنشا ەلدە 54 مىڭ شەتەلدٸك كومپانييا جۇمىس ٸستەگەن. بۇل 1 ماۋسىمداعى كٶرسەتكٸشتەن 9,4 مىڭعا نەمەسە 21%-عا كٶپ, دەپ حابارلايدى ult.kz lsm.kz پورتالىنا سٸلتەمە جاساپ.
ەڭ جوعارى ٶسٸم ٶزبەكستان مەن قىتاي كاپيتالى قاتىساتىن كومپانييالار سانى بويىنشا بايقالدى.
ٶزبەكستاننىڭ قاتىسۋىمەن جۇمىس ٸستەيتٸن كومپانييالار سانى ەكٸ ايدا 5,4 مىڭنان 10,6 مىڭعا دەيٸن ٶسكەن. ياعني ولاردىڭ سانى شامامەن 1,9 ەسە ارتقان.
قىتاي كاپيتالى قاتىساتىن كومپانييالار سانى دا ەكٸ ەسەگە جۋىق كٶبەيٸپ, 4,3 مىڭنان 8,3 مىڭعا جەتكەن.
سونىمەن قاتار قىرعىزستان ينۆەستورلارى قاتىساتىن كومپانييالار سانى 19%-عا ٶسٸپ, 2,3 مىڭعا جەتتٸ. ٷندٸستان كومپانييالارىنىڭ سانى 21,5%-عا ارتىپ, 441-گە, باە كومپانييالارى 26%-عا ٶسٸپ, 439-عا, نيگەرييا كومپانييالارى 41%-عا كٶبەيٸپ, 258-گە جەتكەن.
رەسەيلٸك كومپانييالار سانى ازايدى
قازاقستاندا شەتەلدٸك بيزنەس اراسىندا ەلٸ دە رەسەيدٸڭ قاتىسۋىمەن جۇمىس ٸستەيتٸن كومپانييالار كٶش باستاپ تۇر – 17 مىڭ. الايدا جاز باستالعالى ولاردىڭ سانى 699 ۇيىمعا نەمەسە 3,9%-عا ازايعان.
تٷركييالىق كومپانييالار سانى 3,2%-عا تٶمەندەپ, 3,2 مىڭعا, اۋعانستاننان كەلگەن كومپانييالار 9,7%-عا ازايىپ, 425-كە جەتكەن.
سونداي-اق نيدەرلاند كومپانييالارى 3%-عا, بەلارۋس كومپانييالارى 1,6%-عا, ۋكراينا كومپانييالارى 0,7%-عا قىسقارعان.
شەتەلدٸك بيزنەس قاي سالاعا كٶپ كەلٸپ جاتىر?
شەتەلدٸك ينۆەستورلار ٷشٸن ەڭ تارتىمدى باعىتتاردىڭ بٸرٸ – ساۋدا سالاسى. بۇل باعىتتا 18,4 مىڭ كومپانييا جۇمىس ٸستەيدٸ. ەكٸ ايدا ولاردىڭ سانى 18,8%-عا نەمەسە 2,9 مىڭعا ارتقان.
ال ەڭ جوعارى ٶسٸم قۇرىلىس سالاسىندا تٸركەلدٸ. ماۋسىمنىڭ باسىندا بۇل سالادا 3,5 مىڭ شەتەلدٸك كومپانييا بولسا, 1 تامىزعا قاراي ولاردىڭ سانى 6,3 مىڭعا جەتٸپ, 1,8 ەسەگە ٶسكەن.
ٶڭدەۋ ٶنەركەسٸبٸندەگٸ كومپانييالار سانى 19,2%-عا ٶسٸپ, 2,5 مىڭعا جەتتٸ. قىزمەت كٶرسەتۋ سالاسىندا – 2,5 مىڭ (+9,4%), كٶلٸك جەنە قويمالاۋ سالاسىندا 2 مىڭ كومپانييا (+6,9%) تٸركەلگەن.
شەتەلدٸك كومپانييالاردىڭ باسىم بٶلٸگٸ الماتىدا
شەتەلدٸك بيزنەس ەڭ كٶپ شوعىرلانعان قالا – الماتى. ەكٸ اي ٸشٸندە مۇنداعى شەتەلدٸك كومپانييالار سانى 38,9%-عا ٶسٸپ, 21 مىڭنان 29,2 مىڭعا جەتكەن.
استانادا ولاردىڭ سانى 13,4%-عا ارتىپ, 9,9 مىڭعا, شىمكەنتتە 8,3%-عا ٶسٸپ, 1,4 مىڭعا جەتتٸ.
ماڭعىستاۋ وبلىسىندا 2,8 مىڭ (+2,5%), قاراعاندى وبلىسىندا 1,3 مىڭ (+1,2%), اتىراۋ وبلىسىندا 1,2 مىڭ (+3,7%) شەتەلدٸك كومپانييا جۇمىس ٸستەيدٸ.
ال قوستاناي وبلىسىندا ولاردىڭ سانى 6%-عا ازايىپ, 1,1 مىڭعا دەيٸن تٶمەندەگەن.
