Foto: Astana ákimdigi
Astanadaǵy Nurjol býlvarynda shyǵarmashyl eriktilerdiń qurastyryp shyǵarǵan erekshe art-nysan – quraq-kórpe stilindegi eko-shyrsha tanystyryldy, dep habarlaidy Ult.kz elorda ákimdiginiń resmi saityna silteme jasap.
Osyǵan deiin elordada júzege asyrylyp, qala turǵyndarynyń ystyq yqylasyna bólengen bul joba biyl turǵyndardyń suranysy boiynsha jańartylǵan ári mazmuny tereńdetilgen formatta usynyldy. Joba dástúrli qolónerdi zamanaýi kreativti indýstriiamen ushtastyryp, óner, ekologiialyq sana jáne áleýmettik birliktiń bir arnada toǵysa alatynyn kórsetti.
Uiymdastyrýshylardyń aitýynsha, bastamanyń basty maqsaty – ulttyq qundylyqtardy qazirgi qalalyq keńistikke beiimdeý.
«Quraq-kórpe stilindegi eko-shyrsha jobasy qalaǵa turǵyndardyń tikelei suranysy boiynsha qaita oraldy. Ol alǵash ret 2020 jyly júzege asyrylǵan edi. Biz úshin bul joly ideiany jai ǵana qaitalaý emes, ony jańartyp, jańa mazmunmen tolyqtyrý mańyzdy boldy. Biyl joba Jumysshy mamandyqtar jyly men Jylqy jylynan shabyt aldy, bul eńbekke qurmettiń, qozǵalystyń, kúshtiń jáne dástúrmen tiri bailanystyń simvoly. Shyrshaǵa arnalǵan barlyq toqyma oiynshyqtar balalardan bastap aǵa býyn ókilderine deiingi qala turǵyndarynyń qolymen nólden jasaldy», – dedi joba uiymdastyrýshysy Rahima Mukýsheva.
Foto: Astana ákimdigi
Eko-shyrsha men toqyma oiynshyqtardy jasaýǵa úsh býyn ókilderi – ájeler, analar, qyzdar men nemerelerden quralǵan 50-den astam erikti qatysty. Bar bolǵany eki kún ishinde nólden bastap 100-den astam toqyma oiynshyq daiyndalyp, simvoldyq «Jaqsylyq sandyǵyn» toltyrdy. Bul buiymdar elorda turǵyndary men qonaqtaryn qýantatyn úlken art-obektiniń ajyramas bóligine ainaldy.
Joba Qazaqstandaǵy Jumysshy mamandyqtar jyly aiasynda júzege asyrylyp, qol eńbeginiń, urpaqtan urpaqqa jalǵasyp kele jatqan qolóner daǵdylary men kásipterdiń mańyzyn aiqyndaidy. Sonymen qatar, qolmen jasalǵan eńbektiń mádeni bastamalar men kreativti ekonomikanyń berik negizi bola alatynyn kórsetedi.
