2027 jylǵy 1 qańtardan bastap Qazaqstanda ataýly áleýmettik kómek (AÁK) taǵaiyndaýdyń jańa erejeleri kúshine enedi. Úkimet tólem mólsherin esepteý tártibin, kómektiń túrlerin taǵaiyndaý sharttaryn jáne AÁK-ke muqtaj emes dep taný ólshemderin bekitti, dep habarlaidy ult.kz.
Úkimettiń 2026 jylǵy 19 qazandaǵy №931 qaýlysyna sáikes, ataýly áleýmettik kómektiń mólsheri otbasynyń jan basyna shaqqandaǵy ortasha tabysy men óńirde belgilengen kedeilik sheginiń aiyrmasy negizinde esepteledi.
Esepteý kezinde elorda, oblystar jáne respýblikalyq mańyzy bar qalalar úshin belgilengen kórsetkishter eskeriledi. Tólem mólsheri otbasynyń ár múshesine shaqqanda anyqtalady.
AÁK-tiń qandai túrleri qarastyrylǵan?
Jańa erejede shartsyz jáne shartty aqshalai kómek kórsetý tártibi belgilengen.
Shartsyz aqshalai kómek jumyspen qamtýǵa járdemdesý sharalaryna qatysý múmkindigi shekteýli, tabysy tómen azamattarǵa beriledi.
Olarǵa:
- zeinet jasyna jetken adamdar;
- I nemese II toptaǵy múgedektigi bar azamattar;
- ýaqytsha eńbekke jaramsyzdyǵy eki aidan asqan adamdar jatady.
Sonymen qatar, otbasy quramynda eńbekke qabiletti adam bolmaýy kerek. Alaida otbasyndaǵy jalǵyz eńbekke qabiletti adam úsh jasqa deiingi balany, múgedektigi bar balany, I nemese II toptaǵy múgedektigi bar adamdy ne bógde adamnyń kútimi men kómegine muqtaj qartty baǵyp otyrǵan jaǵdaida erekshelik qarastyrylǵan.
Shartty aqshalai kómek alý úshin áleýmettik kelisimshart jasaý mindetti bolady.
Budan bólek, qaýlyda azamattardy ataýly áleýmettik kómekke muqtaj emes dep tanýǵa negiz bolatyn ólshemder de qamtylǵan.
Jańa erejeler Úkimettiń 2026 jylǵy 19 qazandaǵy №931 qaýlysymen bekitildi. Qujat 2027 jylǵy 1 qańtardan bastap qoldanysqa engiziledi.
