Tanymal ánshi Serik Ibragimov «MýzART» tobynyń múshesi Meirambek Bespaevtyń 50 jas mereitoiyna erekshe syilyq joldady. Óner iesi merekelik keshke ózi qatysa almasa da, ánshi aǵasyna qurmet kórsetip, arnaiy shapan japqyzdy, dep habarlaidy ult.kz.
Meirambek Bespaev jarty ǵasyrlyq mereitoiyn týǵan jeri Qyzylordada shyǵarmashylyq kontsertpen atap ótti. Saltanatty keshke ánshiniń ónerdegi áriptesteri, dostary men jaqyndary jinalyp, mereitoi iesine aq tilekterin arnady.
Merekelik keshke Serik Ibragimov ta arnaiy syilyq daiyndaǵan. Alaida Astanadaǵy shyǵarmashylyq jumystaryna bailanysty Qyzylordaǵa bara almaǵan ánshiniń atynan belgili "Jaidarman" oiynshysy Asylhan Dúkenbaev kóterilip, arnaiy sálemin jetkizdi. Ol ánshiniń amanatyn oryndap, Meirambek Bespaevtyń iyǵyna shapan japty. Ol ánshiniń sońǵy ýaqytta kino salasynda da belsendi eńbek etip júrgenin aityp, kópshilikti kúldirdi.
"Seriktiń qazir ánshilikten bólek, kino salasynda júrgenin bilesizder. Osydan eki jyl buryn "Zamanbek" degen kino túsirip, 1,5 milliard kassa jinaǵan. Qazir "Zamanbek-2" degen kino túsirip jatyr. Qunyqty ma, bilmeimin ǵoi, endi", – dedi ol ázildep.
Onyń sózinshe, Serik Ibragimov dál sol ýaqytta Astanada ótken filmniń aldyn ala kórsetilimine qatysqandyqtan, mereitoilyq kontsertke kele almaǵan.
Soǵan qaramastan, ánshi Meirambek Bespaevqa degen qurmetin qazaqy dástúrmen jetkizýdi jón kórgen.
Budan bólek, Serik Ibragimov Instagram paraqshasynda mereitoi iesine arnap júrekjardy tilegin jariialady.
"Meirambek aǵamyzdyń 50 jas keshi qutty bolsyn! Aǵamdy erekshe jaqsy kóremin, syilaimyn", – dep jazdy óner iesi.
Osylaisha, Serik Ibragimov mereitoilyq keshke qatysa almasa da, Meirambek Bespaevqa degen ystyq yqylasyn bildirip, arnaiy syilyǵyn tabystady.
Serik Ibragimov kim?
Serik Ibragimov – qazaqstandyq estrada ánshisi, "Daryn" memlekettik jastar syilyǵynyń laýreaty. Ol 1988 jyly 22 qańtarda Qyzylorda oblysynyń Túgisken aýylynda dúniege kelgen. Bolashaq óner iesi alty baýyry bar kópbalaly otbasynda tárbielengen. Bes jasynda alǵash ret sahnaǵa shyǵyp, bala kezinen túrli án baiqaýlaryna qatysqan. Toǵyzynshy synypty aiaqtaǵan soń Qyzylorda mýzykalyq kolledjine oqýǵa túsken. Keiin Qurmanǵazy atyndaǵy Qazaq ulttyq konservatoriiasynda bilimin jalǵastyrǵan. Ánshi 2018 jyly "Qazaqstan" ulttyq telearnasyna bergen suhbatynda Batyrhan Shúkenovtiń ónerdegi jolyn úlgi tutyp, úrmeli aspaptardy meńgerýge segiz jylyn arnaǵanyn aitqan.
Onyń "Vokzalda qaýyshqan qyz", "Kel maǵan", "Jaiaý", "Qazaqpyz bárimiz" ánderi tyńdarmanǵa tanymal. 2018 jyly óner iesi "Daryn" memlekettik jastar syilyǵyna ie boldy. Sol jyly úlken sahnadaǵy shyǵarmashylyǵynyń bes jyldyǵyna orai kontserttik sapar uiymdastyrǵan
Keiin ánshilikten bólek, kino salasyna bet buryp, 2024 jyly jaryq kórgen "Zamanback" tolyqmetrajdy filminiń jobasyna qatysty. 2026 jyly atalǵan filmniń jalǵasy "Zamanback-2" jobasymen de ainalysyp júrgeni habarlandy.
