Foto: Polisia.kz
Astanada iri kólemde alaiaqtyq jasady degen kúdikpen 43 jastaǵy azamat ustaldy. Bul týraly Polisia.kz habarlady.
Qalanyń Almaty aýdandyq politsiia qyzmetkerleri “Anti-fraud” jedel aldyn alý is-sharasy aiasynda kúdiktini qolǵa túsirgen. Tergeý derekterine súiensek, ol ózin Ulttyq bank qyzmetkeri retinde tanystyryp, jábirlenýshige telefon arqyly habarlasqan.
Kúdikti “sizdiń depozittik shotyńyzdan belgisiz tulǵalar aqsha aýdarýǵa áreket jasap jatyr” dep senimge kirip, qaýipsizdik maqsatynda jalǵan “qaýipsiz shotqa” 1 million teńge aýdarýdy talap etken. Artynsha iske sybailastary qosylyp, ózderin quqyq qorǵaý organdarynyń qyzmetkerleri retinde tanystyrǵan. Olar “operatsiia jalǵasyp jatyr” degen jeleýmen jábirlenýshiniń ózge de jinaqtary týraly aqparat alǵan.
Sóitip, alaiaqtar azamatty banktegi iri somadaǵy qarajatyn sheship alyp, ony “tekserý úshin” arnaiy kýrerge berýge kóndirgen. Nátijesinde jábirlenýshi 21 million teńgeni qolma-qol alyp, qorapqa salyp, belgisiz adamǵa tabystaǵan.
Jedel-izdestirý sharalary barysynda politsiia qyzmetkerleri aqsha qarajatyn túrli shottarǵa aýdarǵan shetel azamatyn ustady. Qazirgi ýaqytta kúdikti ýaqytsha ustaý izoliatoryna qamalyp, tergeý amaldary júrgizilip jatyr.
Politsiia azamattardy saq bolýǵa shaqyrady: belgisiz adamdardyń telefon arqyly bergen nusqaýlaryna senbeý kerek. Bank nemese quqyq qorǵaý organdary eshqashan aqsha aýdarýdy nemese qolma-qol qarajatty úshinshi tulǵalarǵa berýdi talap etpeidi. Kúmándi jaǵdai týyndasa, dereý politsiiaǵa habarlasý qajet.
