26 maýsym kúni Astanadaǵy Kongress-ortalyǵynda elimizdegi eń iri shahmat jarystarynyń biri – III «Senat Open 2026» ashyq kýbogynyń finaldyq kezeńi ótti, dep habarlaidy ult.kz.
Saltanatty ashylý rásimine Qazaqstan Respýblikasy Parlamenti Senatynyń Tóraǵasy Máýlen Áshimbaev pen Qazaqstan shahmat federatsiiasynyń prezidenti Timýr Týrlov qatysty.
Máýlen Áshimbaev óz sózinde uiymdastyrýshylarǵa alǵys bildirip, «Senat Open 2026» týrnirin elimizde shahmat qozǵalysyn odan ári damytý jolyndaǵy mańyzdy oqiǵa retinde baǵalady.
Foto: Qazaqstan shahmat federatsiiasy
«Prezidentimiz Qasym-Jomart Kemeluly Toqaev Qazaqstannyń ziiatkerlik áleýetin damytýǵa únemi basa mán berip keledi. Bul rette shahmattyń mańyzy zor. «Senat Open» týrniri osy baǵyttaǵy bastamalardy, jalpy shahmatty keńinen nasihattaý úshin qolǵa alyndy. Úsh jyl ishinde saiys aitarlyqtai qalyptasyp úlgerdi. Biyl alǵash ret jarys 1/8 finaldan bastap, búgingi sheshýshi básekege deiin tolyq tórt kezeń boiynsha uiymdastyryldy. Soltústik, Ońtústik, Ortalyq, Shyǵys jáne Batys aimaqtarda ótken bes jartylai final elimizdiń barlyq óńirin qamtydy. Búginde bul týrnir jalpyulttyq qozǵalysqa ainaldy dep aitýǵa tolyq negiz bar. Shahmat taqtasynda kezdeisoq jeńis bolmaidy. Munda strategiialyq oilaý, tabandylyq jáne birneshe júristi aldyn ala eseptei bilý sheshýshi ról atqarady. Dál osyndai qasietter qazirgi tańda qoǵamnyń barlyq salasynda qajet ekeni belgili», – dedi Senat Tóraǵasy.
Timýr Týrlovtyń aitýynsha «Senat Open 2026» elimizdegi shahmat súier qaýymnyń basyn qosqan eń aýqymdy sharalardyń biri bolyp otyr.
Foto: Qazaqstan shahmat federatsiiasy
«Senat Open» týrniriniń tarihy nebári úsh jyldy quraǵanymen, ol Qazaqstannyń birtutas shahmat ekojúiesinde ózindik orny bar bedeldi dodaǵa ainaldy. Jyl ótken saiyn saiysqa qatysýshylar sany turaqty túrde artyp keledi. Bul – eshbir ásireleýsiz aitqanda, jarystyń shyn máninde halyqtyq týrnirge ainalǵanynyń eń aiqyn kórsetkishi. Biyl jarysqa 8 myńnan astam adam qatysty. Týrnirdiń mundai jetistigi kezdeisoq emes. Bul – Memleket basshysynyń tapsyrmasymen shahmatty damytý baǵytynda atqarylyp jatqan júieli jumystyń nátijesi», – dedi Timýr Týrlov.
2026 jylǵy týrnir tórt kezeń boiynsha uiymdastyryldy. Qatysýshylar 1/8 finaldan bastap shirek final, jartylai final kezeńderin eńserip, sheshýshi finaldyq kezdesýlerge joldama aldy. Týrnirge qatysýdyń basty talaby – 2026 jylǵy 1 qańtardaǵy jaǵdai boiynsha klassikalyq shahmat, rapid jáne blits boiynsha Elo reitingi 2000-nan tómen bolýy boldy.
Barlyq kezeńder, sonyń ishinde finaldyq oiyndar da, shveitsar júiesi boiynsha toǵyz týrdan turdy. Qatysýshylar ár partiiada 10 minýt negizgi ýaqyt jáne ár júriske qosymsha 5 sekýnd beriletin rapid formatynda synǵa tústi.
Foto: Qazaqstan shahmat federatsiiasy
1/8 finaldan keiin úzdik oiynshylar shirek finalǵa joldama alyp, óńir jeńimpazdary anyqtaldy. Keiin Soltústik, Ońtústik, Ortalyq, Shyǵys jáne Batys aimaqtary boiynsha ótken jartylai finaldarda eń myqtylar irikteldi. Ár jartylai finaldan 53 qatysýshy finalǵa ótti. Astanada ótken sheshýshi kezeńde olarǵa Qazaqstan Respýblikasy Parlamentiniń depýtattary, respýblikalyq qoǵamdyq keńesterdiń músheleri jáne mandattyq komissiianyń sheshimimen memlekettik qairatkerler qosyldy.
Solardyń biri Taraz qalasy Máslihatynyń depýtaty Kenjeǵali Shilibek. Onyń pikirinshe bul shara shahmat súier qaýymnyń úlken qoldaýyna ie boldy.
«Alǵashqy týrnirde tek depýtattar men qoǵam ókilderi ǵana qatyssa, keiingi eki jylda shara óz nátijesin berip, ár salanyń ókilderi qatysýda. Bul jyldan jylǵa týrnirdiń aýqymy keńeie túskeniniń kórsetkishi. Atalǵan doda tek baq synasý ǵana emes, sonymen qatar basqa óńirlerden tanystar taýyp, tájiribe almasýǵa úlken múmkindik. Shahmat oiyny sabyrlyqty, strategiialyq oilaýdy, durys sheshim qabyldaýǵa úlken septigin tigizedi. Sondyqtan elde shahmatty damytý mańyzdy.
«Senat Open» shahmat týririniń finaldyq kezeńi jyl saiyn Astanada keń zaldarda barlyq jaǵdai jasalyp, úlken sporttyq merekege ainaldyryp otyrǵanyna qýanyshtymyz. Aldaǵy jyldarda bul shara jalǵasyn tabady dep senemin», – dedi týrnirge qatysýshy Kenjeǵali Shilibek.
«Senat Open» ashyq kýbogy 2024 jyldan beri Qazaqstan shahmat federatsiiasynyń uiymdastyrýymen jáne Qazaqstan Respýblikasy Parlamenti Senatynyń qoldaýymen turaqty túrde ótkizilip keledi. Týrnirdiń bastamashysy – Senat Tóraǵasy Máýlen Áshimbaev. Bul bastama Qazaqstan shahmat federatsiiasynyń prezidenti Timýr Týrlovtyń qoldaýyna ie bolǵan.
Foto: Qazaqstan shahmat federatsiiasy
Foto: Qazaqstan shahmat federatsiiasy
Jýrnalisterdiń Parlamenttiń joǵarǵy palatasy taratylǵannan keiin «Senat Open» týrniriniń taǵdyry qalai bolatyny týraly saýalyna jaýap bergen Qazaqstan shahmat federatsiiasynyń prezidenti Timýr Týrlov Parlament qurylymyndaǵy ózgerister týrnirdiń ótkizilýine áser etpeitinin atap ótti.
«Biz óz elimizben birge ózgeremiz. Bizdiń týrnir úlken, mańyzdy, halyqtyq deńgeige kóterildi. Sondyqtan týrnir budan ári de ótkizilip turatyn bolady. Ol bizdiń elimizben birge sátti ózgerip, damyp otyratyn bolady», – dedi azaqstan shahmat federatsiiasynyń prezidenti.
Aýqymdy týrnir shahmatty keńinen nasihattaýǵa, ziiatkerlik sportty damytýǵa jáne túrli sala ókilderiniń basyn qosyp, tájiribe almasýyna múmkindik beretin mańyzdy alań retinde óz máresine jetti.
Foto: Qazaqstan shahmat federatsiiasy
