Foto: QR MAM
Roza Baǵlanova atyndaǵy «Qazaqkontsert» memlekettik kontserttik uiymynda Qazaqstannyń halyq ártisi, Memlekettik syilyqtyń laýreaty, Qyrǵyz Respýblikasynyń eńbek sińirgen ártisi, belgili kompozitor Altynbek Qorazbaevtyń «Án álemi tálimgeri» atty shyǵarmashylyq keshi ótti, dep habarlaidy Ult.kz.
Altynbek Qorazbaev – qazaq mýzyka óneriniń kórnekti tulǵalarynyń biri. Onyń shyǵarmalary zamanaýi qazaq óneriniń ajyramas bóligine ainalyp, urpaqtar sabaqtastyǵyn, dástúrge qurmet pen qoǵamnyń rýhani qundylyqtaryn aiqyn kórsetedi.
Kesh baǵdarlamasynda kompozitordyń qazaq mýzykalyq mádenietinde erekshe oryn alǵan týyndylary oryndaldy. Olardyń qatarynda «Týǵan jer», «Shashbaýlym», «Kózińnen ainalaiyn», «Aýylym», «Elge sálem», «Saǵyndym Almatymdy» jáne basqa da keńinen tanylǵan shyǵarmalar bar.
Kórermenge «Astana» estradalyq-simfoniialyq orkestri men «Astana sazy» Qazaq memlekettik folklorlyq ansambli súiemeldeýimen oryndalǵan ánder usynyldy. Sondai-aq keshte «Gulder» jáne «Birlik» ansamblderi óner kórsetti.
Sahnaǵa Altynbek Qorazbaevtyń shyǵarmashylyǵyn qurmetteitin shákirtteri men ónerpazdar án aityp, keshtiń sánin keltirdi.
