Foto: Olympic.kz
2027 jylǵy 22-30 mamyr aralyǵynda Astanada ústel tennisinen álem chempionaty ótedi. Osylaisha Qazaqstan atalǵan jahandyq dodany qabyldaityn Ortalyq Aziiadaǵy alǵashqy memleket atanady, dep habarlaidy Ult.kz.
10 mamyr kúni Londonda ótken komandalyq álem chempionaty barysynda Qazaqstanǵa Halyqaralyq ústel tennisi federatsiiasynyń (ITTF) týy resmi túrde tabystaldy. Bul – elimizdiń álem chempionatyn ótkizýge daiyndyqty bastaǵanyn bildiretin mańyzdy rásim.
Qazaqstan 2027 jylǵy álem chempionatyn ótkizý quqyǵyna 2025 jyly ITTF Bas assambleiasynyń sheshimimen ie boldy. Daýys berýdiń qorytyndy kezeńinde Qazaqstan 111 daýys jinap, Frantsiiany basyp ozdy.
Álem birinshiligine sportshylar, jattyqtyrýshylar, tóreshiler, delegattar jáne halyqaralyq sport qaýymdastyǵynyń ókilderin qosa alǵanda, shamamen 1250 qatysýshy keledi dep kútilýde.
Qazirgi tańda elimizde 260 myńnan astam adam ústel tennisimen turaqty túrde ainalysady. Onyń ishinde 10 myńnan astamy – kásibi sportshylar. Respýblika boiynsha 12 mamandandyrylǵan ústel tennisi ortalyǵy jumys isteidi. Sonymen qatar Qostanai, Oral, Semei jáne Almaty qalalarynda jańa ortalyqtardyń qurylysy men jobalaý jumystary júrgizilip jatyr.
Sońǵy jyldary elimizde 30-ǵa jýyq ústel tennisi bólimshesi men 35 mamandandyrylǵan zal ashyldy. Óńirlerge 650-den astam kásibi tennis ústeli satyp alyndy. Sonymen birge «Balabaqshadan bastalatyn ústel tennisi» jobasy aiasynda mektepke deiingi uiymdarda arnaiy sektsiialar jumys istei bastady.
Qazaqstandyq sportshylar halyqaralyq arenada da joǵary nátijeler kórsetip keledi. 2025 jyly ulttyq qurama sportshylary halyqaralyq reitingtik týrnirlerde 47 medal jeńip aldy. Erler quramasy Islam yntymaqtastyǵy oiyndarynda chempion atansa, qazaqstandyq tennisshiler álem jáne Aziia chempionattarynda sátti óner kórsetti.
Aita ketý kerek, Qazaqstan buǵan deiin de iri halyqaralyq jarystardy uiymdastyrý tájiribesine ie. 2024 jyly Astanada ústel tennisinen XXVII Aziia chempionaty ótip, jarysqa 25 elden 195 sportshy qatysty. Bul chempionat Ortalyq Aziia aýmaǵynda alǵash ret uiymdastyrylǵan qurlyqtyq doda retinde tarihqa endi.
2027 jylǵy álem chempionaty – Qazaqstan sporty úshin mańyzdy oqiǵa. Atalǵan týrnir elimizdiń halyqaralyq sport keńistigindegi bedelin arttyryp, ústel tennisiniń odan ári damýyna jańa serpin beredi.
