Kollaj: Azattyq Ruhy
«Áskeri qurylys» AQ basshylyǵy biýdjet qarajatyn jymqyrdy degen kúdikke ilindi, - dep habarlaidy "Ult aqparat" Antikor baspasóz qyzmetine silteme jasap.
«Sybailas jemqorlyqqa qarsy qyzmet «Áskeri qurylys» AQ burynǵy prezidenti E. Tájidenovtyń jáne basqalardyń basshylyǵymen uiymdasqan qylmystyq topqa qatysty sotqa deiingi tergeýdi aiaqtady.
11 adam qylmystyq jaýapkershilikke tartyldy. Onyń ishinde týǵan aǵasy men jieni, sondai-aq Tájidenovtyń qaramaǵyndaǵy «Áskeri qurylys» JShS men onyń Astana qalasy boiynsha filialynyń qarjylyq jáne korporativtik qyzmetine jaýapty adamdar bar» - delingen habarlamada.
Antikor málimetinshe, olar taýarlar men qyzmetterdi satyp alýǵa, óteýsiz qarjylyq kómek kórsetýge úlestes kompaniialarmen jalǵan sharttar jasasý arqyly asa iri kólemde biýdjet qarajatyn jymqyrdy degen kúdikke ilingen.
"Zalaldyń jalpy somasy 596 mln teńgeni quraidy. Ony óteý maqsatynda qylmystyq jolmen alynǵan múlikke tyiym salyndy. Qazirgi ýaqytta aiyptalýshylar sotqa berildi" - delingen agenttik habarlamasynda.
Konstitýtsiianyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáikes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deiin árbir adam kinásiz dep esepteledi.
