QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev bankter men jeke kompaniialarǵa QR-kod arqyly qyzmet kórsetýdi usyndy, dep habarlaidy "Ult aqparat".
«Keshe eGov portalynan qyzmetterdi alýda QR-kod engizýdi josparlap otyrǵanymyzdy jazdym. Ózderińiz bilesizder, elektrondyq qoltańba elektrondyq úkimet portalynan bólek salyq tóleýshiler kabinetinde, memlekettik satyp alý saitynda, sot kabinetinde jumys isteý úshin talap etiledi. Biz vedomstvoaralyq komissiia otyrysynda basqa memlekettik organdardaǵy áriptesterimizge óz portaldarynda balama retinde uqsas servisti engizýdi usyndyq. Bul azamattardyń barlyq memlekettik qyzmetti QR-kodty mobildi qosymsha arqyly skanerlei otyryp, ońai alýy úshin qajet», - dep jazdy ministr Facebook paraqshasynda.
Onyń atap ótýinshe, is júzinde eGov mobile memlekettik servistermen jumys isteýde basty quralǵa ainalady jáne kompiýterge túrli baǵdarlamalardy ornatýdyń qajeti bolmaidy.
«Sonymen qatar qoldanýshylardyń kóbi kompiýterdegimen salystyrǵanda smartfondaǵy ETsQ-ny paidalaný áldeqaida yńǵaily jáne ońai ekenin aitýda. Aitpaqshy, biz osyndai múmkindikti bolashaqta bankter men jeke kompaniialarǵa engizýdi usynbaqpyz. Dál osy printsip boiynsha, iaǵni túrli parolderdi este saqtamai-aq, eGov mobile qosymshasyn paidalaný arqyly olardyń resýrstaryndaǵy qajetti qyzmetterdi alýǵa bolar edi», - dedi Asqar Jumaǵaliev.
