Úkimet basshysy Asqar Mamin jumysy baiaý ákimdikterdi synǵa aldy, dep habarlaidy "Ult aqparat".
«Elbasy Nursultan Nazarbaev pen Memleket basshysy Qasym-Jomart Toqaev aldymyzǵa ekonomikanyń turaqty ósimin qamtamasyz etý mindetin qoidy. Biylǵy jyldyń 11 aiynyń qorytyndysyn ótken jyldyń osyndai kezeńimen salystyrǵanda jalpy ishki ónim 4,4 paiyzǵa ósti. Qurylysta – 12,1%, saýdada – 7,5%, kólik salasynda – 5,6%, óńdeý sektorynda, onyń ishinde mashinajasaýda – 19,2%, avtomobil jasaýda – 64%, jeńil ónerkásipte – 16,6%, tústi metaldar óndirisinde – 6,8%, koks jáne munai óńdeý ónimderinde – 5,3%, metall kenin óndirýde – 15,7%, bailanys qyzmetterinde – 4,7%, ónerkásipte – 3,6% oń dinamika baiqalyp otyr. Ulttyq qor aktivteri 4,3%-ǵa, $60,5 mlrd-qa deiin ósti, respýblikalyq biýdjetke kirister – 9595,7 mlrd teńge (josparǵa 100,2%), ósý qarqyny 117,6% qurady. Salalyq ministrlikter men óńirlerdiń basshylaryna kórsetkishterdi josparly deńgeige jetkizý úshin barlyq qajetti sharany qabyldaýdy tapsyramyn», - dedi Asqar Mamin búgingi Úkimet otyrysynda.
Premer-Ministrdiń aitýynsha, jyl basynan beri ekonomikanyń negizgi bazalyq ósý kórsetkishteri boiynsha Aqtóbe, Jambyl, Shyǵys Qazaqstan, Qaraǵandy jáne Túrkistan oblystarynyń ákimdikteri jaqsy jumys atqarǵan.
«Kórsetkishteri ortasha jáne respýblikalyq deńgeiden tómen óńirlerge Qyzylorda, Batys Qazaqstan, Qostanai, Mańǵystaý oblystary men Nur-Sultan, Shymkent qalalarynyń ákimderine aitarym: sizderdiń kórsetkishterińiz jyl qorytyndysy boiynsha eldegi ortasha kórsetkishti tómendetedi. Tiisti qorytyndy shyǵaryp, naqty sharalardy qabyldaýlaryńyz qajet. Oryndalǵan jumystardyń aktilerin jyl sońyna deiin tapsyrýdy qamtamasyz etińizder», - dedi ol.
